6-декабрдиз Дагъустан Республикадин Кьил Сергей Меликов Азербайжан Республикадин Президент Ильгьам Алиевахъ галаз гуьруьшмиш хьана. Идан гьакъиндай “Лезги газетдиз” РД-дин Кьилин алакъадин къуллугъди хабар гана.
Ильгьам Алиева къейд авурвал, Азербайжанди Россиядин жуьреба-жуьре регионрихъ, гьа гьисабдай яз Дагъустандихъ галазни амадагвилин, дуствилин алакъаяр хуьзва. Ида Азербайжандинни Россиядин кьве терефдин алакъаяр вилик тухуниз куьмек гузва. Государстводин кьили лагьайвал, 2022-йисуз Азербайжандинни Россиядин амадагвилин алакъаяр хъсандиз кьиле физва. Идан гьакъиндай и мукьвара кьиле фейи Россиядинни Азербайжандин регионрин уртах форумдини шагьидвалзава.
Азербайжандин государстводин кьили къунши кьве республикадин халкьарин арада фадлай дуствилин алакъаяр авайди ва къенин девирда абур мадни мягькем жезвайди алава хъувуна. И жигьетдай Ильгьам Алиева лагьайвал, Сергей Меликов Бакудиз атуни Азербайжандинни Дагъустандин арада тайин тир хилерай тешкилзавай амадагвилин алакъаяр мадни гегьеншаруник умуд кутазва.
Къунши кьве республикадин халкьар стхавилин гьалари алакъалу ийизвайди тестикьаруналди, Сергей Меликова къейдна хьи, Дагъустанда азербайжанвияр муькуь халкьарин векилрихъ галаз, са хизанда хьиз, дуствилелди яшамиш жезва. Ада инанмишвална хьи, гуьруьшдин сергьятра аваз къунши государствойри санал кIвалахунин алакъаяр гегьеншардай мумкинвал гуда.
Гьа и юкъуз Сергей Меликова Азербайжандин экономикадин министр Микаил Жаббаровахъ галаз алишверишдинни экономикадин рекьяй санал кIвалахунин гележегдин мумкинвилер веревирдна. Суьгьбетдин вахтунда “Север-Юг” транспортдин коридор вилик тухунин, алишверишдин алакъаяр гегьеншарунин, АПК-дин ва туризмдин хилера санал кIвалахунин, инвестицийрин проектар уьмуьрдиз кечирмишунин, культурадин хиляй алакъаяр мадни тешкилунин ва Расул Гьамзатован 100 йисахъ галаз алакъалу мярекатра иштиракунин месэлайрикайни ихтилат кватна.
Санал кIвалахунин кар алай хилерикай ихтилат кватайла, Дагъустандин Кьили къейдна: “Къе чун патал международный транспортдин “Север-Юг” коридор вилик тухун пара важиблу я. И жигьетдай Азербайжанди транспортдин логистика тешкилунин ва ишлемишунин карда къазанмишнавай тежриба чи республика патал менфятлу я”.
Маса хилерикай ихтилат фидайла, Сергей Меликов туризмдин ва АПК-дин хилериз талукь проектар, сифте нубатда хаммал гьялдай промышленностдиз талукьбур, вилик тухунал акъвазна.
Микаил Жаббарова малумарайвал, Азербайжан кьве республикадин къуншивилин, дуствилин алакъаяр вилик тухунин терефдар я. Адани транспортдин “Север-Юг” коридор вилик тухунин кьетIен важиблувал къейдна. И жигьетдай Азербайжандин экономикадин министрди Дагъустан Республикадин Кьилиз государстводин сергьятдилай ахъайзавай транспортдин кьадар гзафардай мумкинвал гунай сагърай лагьана. “Адет яз, йисан и вахтунда алатай йисара парар тухузвай автомашинар государстводин сергьятдилай алудун четин акъваззавайди тир. Къенин юкъуз и важиблу кар къайдадик кваз кьиле физва ва нетижаярни хъсанбур я”, — малумарна ада.
Идалай гуьгъуьниз Дагъустандин Кьил Сергей Меликов Азербайжандин транспортдин ва рекъемрин министр Рашад Набиевахъ галаз гуьруьшмиш хьана. Абуру Дагъустандинни Азербайжандин арада амадагвал гегьеншаруниз талукь хейлин месэлаяр гьялна. Гьа гьисабдай яз, транспортдин “Север-Юг” коридор вилик тухуниз, кьве республикадин меркезрин арада самолетрин алакъа тешкилуниз ва инвестицийрин проектар уьмуьрдиз кечирмишуниз талукьбурни.
Кьилди къачуртIа, Дагъустанди гьуьлуьн инфраструктура вилик тухуниз талукь тежриба чирда. Адан бинедаллаз Махачкъаладин международный гьуьлуьн портни цIийикIа туькIуьр хъийида.
2026-йисан эхирдалди государстводин сергьятдал алай “ЦIийи Филер” ва “Тагьирхуьруьн-Къазмаяр” пунктар цIийикIа туькIуьр хъийида.
Бакудинни Махачкъаладин аэропортарай парар дашмишунин месэла кар алайдаз элкъвена. Рашид Набиева Азербайжандин руководство Дагъустандив кьетIен жуьреда эгечIзавайди къейдна ва ихтилат физвай вири хилерай санал кIвалахиз гьазур тирдакай лагьана. “Чи кьве терефдин алакъаяр мадни вилик тухун патал чна чалай алакьдай вири крар ийида. Чун сад-садан гъавурда акьазва ва чи агалкьунарни сад-садалай аслу я”.
Бакуда Сергей Меликов гьакI Азербайжандин премьер-министр Али Асадовахъ галазни гуьруьшмиш хьана. Абуру Азербайжандинни Дагъустандин арада жуьреба-жуьре хилерай авай стхавилин алакъайриз еке къимет гана ва гележегдин месэлаярни веревирдна.
Сергей Меликова Азербайжан Республикадин Милли Межлисдин председатель Сахиба Гафаровадихъ галазни метлеблу суьгьбетар авуна.
Хийир Эмиров
