Дагъустанди цIийи уьзуьмлухар кутун патал  900 гектар чил гьазурнава. Идакай РД-дин премьер-министр Абдулмуслим Абдулмуслимова малумарна. Адан гафаралди, чубукар  кутунвай чилерин санлай­ къачур кьадар 27,5 агъзур гектардив агакьдалди гзаф жеда. Алай вахтунда муниципалитетра  чубукар­ цун патал  чилер гьазурнава.  2022-йисан эхирдалди­  уьзуьмлухрин майдан 26,6 агъзур гектардив агакьун­ лазим я. И хилез гуьмек гун патал республикади  алай йисуз зур миллиард манат харжнава.

Абдулмуслимова къейд авурвал, эхиримжи йисара ципицIчивилин ва чехирчивилин хилер йигин еришралди виликди физва.

“Эхиримжи йисара чна уьзуьмчивилин хел кIва­чел­ ахкьалдарнава. И карда чаз неинки уьлкведин ва региондин гьукумри, гьакIни чи ципицIчийри ва че­хирчийри куьмекна. Алай йисуз Дагъустанда  кIватI­навай 268 агъзур тонн ципицIрикай  188 агъзур тонн гьялун патал рекье тунва. Бязибуру ихьтин бегьерар тарихда тахьай хьтинбур я лугьузва”, — малумарна премьер-министрди.

Ада гьисабзавайвал, бул бегьерар вахчунин себебрик неинки чилерин кьадар гегьеншарун, гьакIни и хиле эхиримжи йисара алай аямдин цIийи технологияр ишлемишун акатзава.

“ИкI, месела, къенин юкъуз республикада 4 агъзур­ гектардилай гзаф ципицIлухар стIал-стIал яд гудай къайдадалди дигизва. Чаз гьакIни виниз тир технологияр истемишзавай сортарин ципицIар гьасилиз чир хьанва, гьа са вахтунда жуван хсуси сортарни хвенва — абурун кьадар 300-далай гзаф ава”, — лагьа­на ада.

А.Абдулмуслимова бязи  четин месэлайрикайни­  лагьана. ИкI, регионда ципицIрин къелемрин кьитвал ава.

“Чаз хсуси къелемар ва питомникар лазим я. И месэла чна 2018-йисалай федеральный дережада хкажзава. Гьелелиг ам гьялиз алакьнавач, амма “чкадилай юзурнава” — алатай йисуз СтIал Сулейманан районда чна питомник кардик кутуна. Санлай къачурла, республикадихъ 3-3,5 миллион чубукдин игьтияж ава”, — гьисабзава ада.

Чи мухбир