27-ноябрдиз Мегьарамдхуьруьн райондин Советский хуьре боксдай кIвенкIвечивилин турнир кьиле фена. Муниципалитетдин пресс-къуллугъди хабар гузвайвал, Украинада кьиле физвай махсус серенжемда телеф хьайи аскеррин экуь къаматдиз бахшнавай турнирда мектебра кIелзавай 70-далай виниз жегьил спортсменри иштиракна.
Мярекатдин тешкилатчияр райондин администрациядин физический культурадин ва спортдин, образованидин управленияр тир.
Муниципалитетдин кьил Фарид Агьмедова къейд авурвал, районда тешкилзавай спортдин мярекатрин кьилин макьсадрикай сад акьалтзавай несилдин векилар ватанпересвилин руьгьдаллаз тербияламишун я. Са шакни алачиз, жуьреба-жуьре рекьера кьегьалвилер, баркаллувилер къалурзавайбурун гьуьрметдай тешкилзавай гьар са мярекатдихъ жегьилар халис ватанпересар яз чIехи авунин карда еке метлеб ава.
Къейд ийин хьи, акъажунра гъалибчияр заланвилин 16 категориядай тайинарна. Абуруз дипломар, медалар ва пишкешар гана.
«Лезги газет»
