“Лезги.спорт” чешмеди хабар гузвайвал, 11-декабрдиз Москвада, спортдин “Крылья Советов” тIвар алай комплексда, ММА-дай акъажунар кьиле фида. Турнирдин кьилин бягьсина чи ватанэгьли Руслан Сатиевани Египетдай тир Магьмуд Мандоди иштиракда.
РикIел хкин, Руслан Сатиеван бине Мегьарамдхуьруьн райондин ЦIелегуьнрин хуьряй я. Вичин жегьил яшариз килигайла (адан 23 йис я), Руслан Сатиевахъ тарифиз, еке умудар кутаз жедай агалкьунар хьанва: ам ММА-дай 3 сеферда — дуьньядин ва гьакьван сеферра Урусатдин чемпион я.
* * *
24-25-ноябрдиз Москвада Урусатдин Игит, армиядин генерал Е.Н.Зиничеван экуь къаматдиз бахшнавай Вирироссиядин гъутаралди кукIунай турнир кьиле фена.
Акъажунра уьлкведин жуьреба-жуьре регионрай хейлин спортсменри иштиракна. 73 килограммдин заланвал авайбурун арада бине Хив райондин ЧIилихърин хуьряй тир С.Рустамова 1-чка кьуна.
Къейд ийин хьи, ам спортдал тренер Камил Абдурагьманован гъилик машгъул жезва.
* * *
27-ноябрдиз Коми Республикада гъутаралди кукIунай кардик квай Федерациядин президентдин кубок патал акъажунар кьиле фена. Ана иштиракай чи са шумуд ватанэгьлиди кIвенкIвечи чкаяр кьуна. ИкI, 1-чкаяр кьурбурун арада ахцегьви Артур Гьасанов, белижви Ислам Абдулгъаниев, Герейханован хуьряй тир Агъалар Агъарагьимов ава. Гъепцегьви Фарид Муслимова — 2, Уружбайрин хуьряй тир Мелик Абдуллаева 3 чкаяр кьуна.
Къейд ийин хьи, абур вири Коми Республикада яшамиш жезва.
«Лезги газет»
