ЦIи чи халкьдин машгьур ша­ир, гьикаятчи, чIехи ватанперес Дадашбаладин хва Забит Ризванов  рагьметдиз фейидалай инихъ 30 йис алатнава. Гьи­кьван йисар алатайтIани, Забит муаллим хьтин, вири уьмуьр эл­дин рекьиз бахш авур кьегьал­рин тIварар, крар чи рикIелай алатдач.

И вакъиадихъ галаз алакъалу яз, мукьвара КцIар райондин Манкъулидхуьре Забит Ризванован экуь къамат рикIел хкуниз та­лукьарнавай мярекат кьиле фена. Иштиракчийри шаирдин руьгь­диз дуьаяр авуна, Ясин кIел­на.­

Мярекатдал рахай ксарин арада рагьметлу шаирдин руш Китабени авай. Иштиракчийри Забит муаллим рикIел хкана, шаирдин экуь къаматдиз талукьарнавай шиирар кIелна, халкьдин патай адаз авай кIанивални гьуьрмет къейдна.

Мярекат кьиле тухвай и цIа­рарин автор шаирдин 100 йисан вилик авуна кIанзавай крарикай рахана, иштиракчийриз сагърай лагьана.

И куьруь макъала чаз же­гьил шаир Энжем Веледова ­Забит Ризванован экуь къаматдиз бахшна кхьенвай шиирдал акьал­тIариз кIанзава:

ЧIехи Забит, атанва чун сурал ви,

Ваз кхьенвай шиирдикай пай кьуна.

Агъзур суал алтIуш хьанва хурал зи,

Кузва зи рикI, ялав кьуна, цIай кьуна.

 

ЧIехи устад, атанва чун сурал ви,

Хайи чилин цуькверикай пай кьуна.

Ви шиирра мад къекъвезва хиял зи,

Руьгьда, рикIе хажалатдин къай туна.

 

Абдуллагьан ракъини экв ганай ваз,

Экуь рикIе хайи халкьдин пар туна.

Ви экуь рехъ чIехи чешне хьанай чаз,

Эбеди яз чал лезгидин тIвар туна.

Вакъиф  Муьшкуьрви