29-ноябрдиз “Дагъустан” РИА-да кьиле фейи пресс-конференциядал журналистрин суалриз РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова жавабар гана.

Ада хабар гайивал, республикада цIи, санлай къачурла, дагъларай арандиз 1,5 миллиондив агакьна куьлуь ва 200 агъзурдалай виниз ири карч алай гьайванар куьчардайвал я. Алай вахтунда абурун чIехи пай куьчарнава.

“Дагъустандин чилерин 86 процент хуьруьн майишатдин метлеб авай мулкар я. Абурукай 2,7 агъзур гектар малар, лапагар хуьдай уьруьшар я. Малдарвал республикадин экономикада асул хилерикай сад я. Гьавиляй гьайванар санай масаниз куьчарун дагъви чубанрин хивевай кар алай везифайрикай сад я”, — къейдна Ш.Шарипова.

Лагьана кIанда, куьлуь ва ири карч алай гьайванрин кьадардал гьалтайла, Дагъустан уьлкведин кIвенкIвечи регионрин жергейра ава. Алай йисан делилралди, Дагъларин уьлкведа лапагрин кьадарди 4,6 миллион тешкилзава. Ири карч алай гьайванрин кьадар 900 агъзурдалай алатнава.

Чи мухбир