Мукьвара Татарстан Республикадин Набережные Челны шегьерда кардик квай “Лезгияр — Татарстанда” тешкилатдин 25 йис тамам хьун къейдна. Идакай ФЛНКА-дин сайтди хабар гузва.
Тешкилатдин тарих 1996-йисалай гатIунзава. Гуьгъуьнлай са кьадар вахтунда официальный регистрациядикай магьрум хьана. Амма и йисара ада кьиле тухузвай кIвалах давам жезвай. 2018-йисуз тешкилат нубатдин сеферда регистрация хъувуна. Вири и йисара адан кьиле бине КцIар райондай тир Фиррудин Сулейманов акъвазнава.
Юбилейдин мярекат Набережные Челны шегьерда авай халкьарин Дуствилин кIвале кьиле фена. Адан сергьятра аваз Самара шегьерда яшамиш жезвай художник Фуад Саидагьмедован кIвалахрин выставкани тешкилнавай. Дуствилин кIвалин сегьнедал Татарстанда авай лезгийрин жемиятдин кьуьлердайбурун коллективри милли парталар алаз авур кьуьлер иштиракчийри хушдиз кьабулна.
Мярекатдал рахай агъастIалви шаир, инженер Юрмет Нагъиева ватанэгьлийриз тешкилатдин 25 йис тамам хьун мубаракна ва вичин стха, лезгийрин машгьур шаир Фейзудин Нагъиеван “Сагъ я лезги халкь” шиир кIелна.
ФЛНКА-дин патай рахай Ярославль шегьерда авай лезгийрин милли тешкилатдин кьил Васиф Гьасанова ФЛНКА-дин президент Ариф Керимован тебрикдин чар кIелна ва Фиррудин Сулеймановав Гьуьрметдин грамота вахкана.
И юкъуз лезгийриз вакъиа мубаракиз мад Набережные Челны шегьердин исполнительный комитетдин руководителдин заместитель Рамил Халимов, “Генералы мира — за мир” тешкилатдин регьбер Аким Селимов, Дуствилин кIвалин директор Ирек Шарипов ва масабур атанвай. Лезгийрин милли тешкилатдин 25 йис тамам хьун мубаракайбурун арада гьакIни Татарстан Республикадин Государстводин советдин председатель Фарид Мугьаметшин, Дагъустандин милли сиясатдин ва динрин крарин рекьяй министр Энрик Муслимов, Къиргъизистандин халкьарин Ассамблеядин президент Абдыган Эркебаев авай. Фиррудин Сулейманован тIварцIел тебрикдин чар Набережные Челны шегьердин мэр Наил Магдеевани ракъурнавай.
Юбилейдин мярекатдин сергьятра аваз КцIар райондай тир манидар Бегьруз Гьажибегован концертни кьиле фена.
Чи мухбир
