ЦIи  “Самур” газетдин 30 йис тамам хьанва. Къецепатан уьлкведа лезги чIа­лал акъатзавай, лезгивал, лезги адетар, лезги къилих хуьзвай газет кIелза­вай­буру хушдиз кьабулзава.

Са гъвечIи сейр ийин чна “Самурдин” тарихдиз. Гьукуматдин патай авай «сергьятвилеризни» килиг тавуна, Азербайжанда акъатиз башламишай газетдин сад лагьай редактор машгьур писатель Фейруз Беделовакай хьанай. Ада газетдиз регьбервал гайи 8 вацра газетдин 24 нумра акъатна. Гуьгъуьнлай редакторвиле искусстводин илимрин доктор Нуреддин Гьабибов тайинарна. Ада газетдин 21 нумра акъудна.

1997-йисалай “Самур” газетдин редакторвиле Азербайжандилай къецени маш­гьур шаир, гьикаятчи, жемиятдин де­ятель, таржумачи, композитор, художественный фильмайрин режиссер… Се­дакъет Керимовади кIвалахзава. Адан алахъунар себеб яз “Самур” газетдин тIвар неинки Азербайжанда, гьакIни вичиз гзаф кIелзавайбур ва амадагар авай Дагъустандани машгьур я.

Дагъустандин халкьдин шаир, ХХ асирдин Гомер СтIал Сулейманан райондин администрацияди, депутатрин собраниди, яратмишдай интеллигенциядин векилри, вири районэгьлийри “Самур” газетдин 30 йис тамам хьун адан коллективдиз, редактор Седакъет Керимовадиз, газет кIелзавай вирибуруз рикIин сидкьидай мубаракзава.

Хазран Кьасумов