“Лезги газетдиз” РД-дин Гьукуматдин пресс-къуллугъди хабар гайивал, Новокъули хуьре “Сохраним лес” серенжемдин сергьятра аваз 300-дав агакьна къелемар цана. Серенжемдин иштиракчийрин арада РД-дин Гьукуматдин Председателдин заместитель Нариман Абдулмуталибовни авай.
Вице-премьерди къейд авурвал, алай йисуз экологиядин мярекатар республикадин 28 муниципалитетда кьиле тухвана ва абурун сергьятра аваз 107 гектардин майданра жуьреба-жуьре жинсерин 210 агъзурдалай виниз къелемар цанва.
“Гьар йисуз “Сохраним лес” серенжемда иштиракзавайбурун кьадар артух хьун шад жедай кар я. Ида серенжемдихъ авай важиблувилин, ада инсанрин фикир желбзавайдан гьакъиндай шагьидвалзава. Элкъвена чун кьунвай надир тIебиат саламатдиз хуьн чи виридан буржи я. Дагъустанда тамарин мулкарин кьадар артухарунин жигьетдай РД-дин Гьукуматди республикадин тамун майишатдин Комитетдихъ галаз санал кIвалахзава. Ихьтин къайда инлай кьулухъни давам жеда”, — лагьана Н.Абдулмуталибова.
«Лезги газет»
