Виликдай чун, шаирар, прозаикар Дагьустандин писателрин Союзди вири районрин хуьрериз чи яратмишунрихъ галаз таниш арун патал рекье твадай. Кьисметди са сеферда зунни Кьурагь райондин Кьуьчхуьррин хуьруьз акъудна. Зи вилерик, и хуьруьз гьахьайла, дагъдин синел, хурал саз кьуна, хкаж хьанвай Ашукь Саидан гуьзел къамат пайда хьана. Зи япара адан «Эренлер» манидин ван гьатна.
Чун хуьруьн колхоздин, вични Ашукь Саидан тIварунихъ галай, председатель Имамедин Агъабалаева къаршиламишна. Чун адан идарадиз гьахьна. Жузун-качузун авурдалай кьулухъ за адаз зи фикир лагьана: вучиз адан далудихъ цлакай Саидан портрет куьрсарнавачтIа? Махачкъалада Саидан эсеррал, теснифрал ашукь тир художник Абид Азизов ава. Къуй ада шаирдин шикил чIугурай.
Имамедин халуди чун вичин дуст Шукуран кIвализ хутахнай. Адани чаз вичиз ван хьайи ашукьдин делилрикай лагьанай.
Пака, юкъуз, чун шаир хайи кIвалин еридал атанай. Заз мискIиндин куьгьне цлар акурла, шаир мад зи вилерик хтанай.
А береда за «Пуд дагъ» гьикая кхьенай, ахпани — шиирар.
Пара чкайра, иллаки Азербайжанда, заз къелемдин дустар ава. Къебеле, Къалажух, Къурбанд Эфенди ва маса хуьрера.
Къалажухви Гьуьсейн муаллимдикай за лезги газетдиз очеркни кхьенай. Адаз Саидан шиирар хуралай чидай.
Герейханован совхозда яшамиш хьайи рагьметлу Паша халудин чIехи стхади, месел ацукьна, вични начагъ тиртIани, Саидан, Эминан гзаф шиирар хуралай кIелнай. Заз акI хьанай хьи, гуя шаиррин къаматар зи вилик ква.
Са гафуналди, акьван вахт фенач (Кьуьчхуьррин) колхоздин председатель са шумудра чи художникдин патав акъатна. Шаирдин портрет гьазурна вахканай.
Ахпа, вахтар алатайла, ашукьдин шикилар маса художникрини чIугваз хьана.
Агъабалаеваз а вахтунда партиядин райкомди еке туьмбуьгьни авунай — пул гьиниз харжна лугьуз.
Заз инал къейд ийиз кIанзава: Имамедин халу руьгьдиз пара михьи ва девлетлу инсан, лезги литературадал пара рикI алай хиневи я. Адан гафаралди заз лугьуз кIанзава, Ашукь Саидан вири яратмишунар чав агакьнавач ва а кардин геле рикI авай ксар гьатна кIанда. Иллаки Азербайжандин хуьрера, библиотекайра килигна кIанда. Геокчайда, Алидхуьре ва масанра шаир са шумуд йисуз яшамиш хьанай.
Бикеханум Алибегова
