Эхиримжи зенгинин сувар школа акьалтIарзавай жегьилринни сифте яз партайрихъ ацукьзавай аялрин уьмуьрда рикIел аламукьдай лишанлу вакъиа я. Эхиримжи вахтара ам ЕГЭ-йрилай вилик, 23-24-майдиз, къейдзава.
2018-йисуз чи уьлкведа агъзурралди жегьилри, юкьван чирвилерин мектебар акьалтIарна, чIехи ва жавабдар уьмуьрдиз кам вегьезва. Абурун арада 12 агъзурдалай виниз дагъустанвиярни ава. Уьлкведа санлай 730 агъзур жегьилди, абурукай яз 12668 дагъустанвиди ЕГЭ вахкузва.
Ахцегь районда цIи 177 жегьилди 11-класс ва 301 жегьилдини 9-класс акьалтIарзава. Иллаки 11-классрин выпускникар патал гьукуматдин имтигьанар (ЕГЭ) вахкунив эгечIзавай виридалайни четин ва жавабдар вахт алукьнава. Чна жегьилриз чандин мягькем сагъвал, шадвал ва имтигьанар вахкуна, гьакI чIехи къайгъудар уьмуьрда еке агалкьунар хьун тIалабзава. Умудлу я хьи, абурулай и имтигьанар лайихлувилелди вахкуз ва иллаки хъсан чирвилер авай парабурувай уьлкведин кесерлу вузрик экечIиз алакьда.
Дашдемир Шерифалиев
