Япониядиз икьрар кутlуниз кlанзава

Япониядин премьер-министр Синдзо Абэди Россиядихъ галаз ислягьвилин икьрар кутlунунин месэла гьялуник умуд кутазва. Идан гьакъиндай ада В. Путинахъ галаз рахайдалай кьулухъ “Хабарар” РИА-диз малумарнава.

“70 йисуз тестикьар тавур ислягьвилин икьрардин месэ­ла гьялун регьят­ туш, амма чаз чи несилда и месэладал нукь­тlа эцигиз кlанзава. Им чи пландин кьилин месэла я”, — ла­гьана Абэди.

Вичин патай В.Путина Россиядин ва Япониядин итижриз жаваб гудайвал, и месэладиз талукь къарар сабурлувилелди кьабулун теклифна. Идалай вилик Россиядин регьберди малумарнай хьи, Кьиблепатан Курилрин островрал экономикадин рекьяй саналди тир кlвалахар тухуналди ва идахъ галаз сад хьиз кьве терефдин алакъаярни еримлу авуналди, ислягьвилин икьрар кутlуниз жеда.

Къейд ийин, Россиядинни Япониядин арада ислягьвилин икьрардал къул чlугун тавуна 70 йис я.

Хуситри арабрал гьужумзава

Йемендин президент Абд Раббо Мансур Хадидин кьушунар хуситрин ракетайрин гьужумдик акатна. Идакай “Аль-Масира” телеканалди малумарнава.

Хуситар Йемендин сергьятра кардик квай, яракьламиш хьанвай десте я. Хуситрин ракетайрин дестеди Йемендин Таиз вилаятда авай арабрин яракьлу къуватрал баллистический ракета М-2 ахъайна.

Идалай виликни, 10-майдиз, малум туширбуру Йемендин къерехда Россиядин къуьл авай гими ракетадив янай. Ракета гимидин пар янавай паюна акьуна, гимида 50 агъзур тонн техил авай.

Йеменда граждан дяве аваз са шумуд йис я. Дяве ийизвай терефрикай сад хуситрин (шиитрин “Ансар Аллагь” теш­килат) кьушун, муькуьди абуру суьргуьн авур суннитрин­ президент Абд Раббо Мансур Хадидин кьушунар ва Са­удовская Аравия кьиле авай кlватlал я.

Президентри веревирдна

РФ-дин Президент В. Путина малумарайвал, Франциядин президент Э. Макронахъ галаз кибертахсиркарвилиз акси женг тухунин месэла веревирдна.

“Кибертахсиркарвилихъ галаз санал женг тухунин, кьве терефдинни итижар, ихтиярар хуьнин гьакъиндай ихти­ла­тарна”, — лагьана Путина Франциядин президентдихъ галаз­ рахайдалай кьулухъ. Идалайни гъейри­, абуру США Ирандин ядерный икьрардай экъечlунин гьалар веревирдна­.

Уьлквейрин регьберри Украинадин кьиблединни-рагъакlидай пата ­къайда туниз талукь тир Минскдин икьрар тамамарунин важиблувални къейдна.

Россиядин аскерар телеф хьана

Сирияда боевикри гуьлле гу­никди Россиядин военный кьуд меслятчи кечмиш ва вад аскердал хирер хьана. Идан гьакъиндай Оборонадин министерстводин делилрал асаслу яз, “Хабарар” РИА-ди малумарнава.

“Сириядин Дейр эз-Зор вилаятда Сириядин гьукуматдин кьушунрал йифен вахтунда террористрин са шумуд дестеди гьужумна. Сириядин батарея идара ийизвай Россиядин кьве военный меслятчиди чкадал чан гана”, — къейд­нава чешмеди.

Россиядинни Сириядин аскерри боевикрихъ галаз са сятда кьван женг тухвана, РФ-дин оборонадин министерстводин делилралди, женгинин ­нетижада 43 боевик тергна. Гуьгъуьнлай малумар хъувурвал, кьве мес­лятчидилай гъейри, женгера хирер хьайи мад кьве россияви аскер телеф хьана.

Россияди Сирияда 2015-йисан сентябрдилай военный операция кьиле тухузва. 2017-йисан эхирда оборонадин министерстводи Россиядин 41 аскер телеф хьайидакай официальнидаказ раижнай.

Телефондин тадарак себеб яз цlай кьуна

Орловский областдин Ливны шегьердин агьалиди ток гудай тадарак къайдадик квачир телефон зарядка ийидай тадарак  розеткадик кумаз туникди кlвали цlай кьуна.

Цlай кьур макъамда иесияр кlвале авачир. Гумадин ни гьисс авур къуншийри тадиз цlаяр хкадардайбурун дестедиз эверна.

Малумарзавайвал, кlвалин иесиди розеткада тунвай телефон зарядка ийдай тадарак себеб яз цlай кьуна.

Къейд ийин, токдихъ ва маса тадаракрихъ галаз алакъалу ихьтин чlуру дуьшуьшар, мукъаятсузвални ка­гьулвал себеб яз, гзаф жезва.

Гьазурайди — Куругъли Ферзалиев