Вичикай ихтилат физвай Хийир Тагьирович Абдулкеримов здравоохранение, медицинадин илим вилик тухунин кардик кьетlен пай кутунай ва гзаф йисара гьакъисагъвилелди зегьмет чlугунай “РФ-дин лайихлу духтур” лагьай вини дережадин тlвар къачунвай машгьур духтур я.
Хийир Абдулкеримован ватан Ахцегь райондин Калук хуьр я. Алай вахтунда Екатеринбургда яшамиш жезвай ватанэгьлидин тlвар и шегьердилай къецени машгьур я. Ам оториноларингологиядин ва нейрохирургиядин рекьяй вичихъ дуьньядин дережада нуфуз авай пешекар, Уралдин федеральный округдин ва Свердловский областдин кьилин отоларинголог, 2004-йисалай Уралдин гьукуматдин медицинадин академиядин профильный кафедрадин заведующий, профессор, медицинадин илимрин доктор я.
Уралдиз жегьил духтур 1986-йисуз фена. Пешедин рекьяй ада Тюменда, Агъа Тагилда кlвалахна, гуьгъуьнлай ам Екатеринбург шегьердиз акъатна. Медицинадин хиле зурба чирвилер авай дагъвидин къелемдикай 280-далайни гзаф илимдин кlвалахар, гьа жергедай яз студентарни духтурар патал чирвилерин ва методикадин 15 пособие, 5 монография хкатнава.
Медицинадин илимдал машгъул ксарин арада вичихъ чlехи нуфуз аватlани, ада кабинетда ацукьнавай алимдин жуьреда кlвалахзавач; ам датlана гьерекатдик квай, нерай гипофиздин лап четин операцияр кьилиз акъудзавай тежрибалу хирург я. Къейдна кlанда хьи, и жуьредин операцияр чи уьлкведа анжах са тlимил хирургривай кьилиз акъудиз жезва.
Профессорди вичин кlвалахдин вахтунин гьар са декьикьа са тайин месэла патал тайинарнава: гагь кафедрайра жезва, гагь азарханадал гуьзчивал тухузва, гьар юкъуз медицинадин рекьяй меслятар гузва, вацра цlудралди операцияр ийизва…
Хийир духтурдихъ галаз кlвалахзавай пешекарри адан кьетlен алакьунрин ва духтурвилин рекьяй адахъ авай дерин чирвилерин гьакъиндай са сивяй хьиз ингье вуч лугьузватlа: “Ихьтин алакьунар авай духтур квез жагъидач. Са гафуналди лагьайтlа, еке бажарагъ я!”.
Лезги духтурдин регьимлувиликай, дикъетлувиликай, бажарагълувиликай чпин патай махсус сайтда алхишдин гафар кхьизвайбуру ам Аллагьдин патай пай ганвай кьетlен пешекар яз гьисабзава.
Кlвалахдин гъиляй са артух мажал жезвачтlани, ада гьар йисуз вичин хайи ватандиз хъфидай вахт жагъурзава. Мукьвара Уралда Абдулкеримоврин хизандикай духтуррин сихилдикай хьиз рахада. Хийир Тагьировича уьмуьрдин юлдаш Зубейда Сейфуллагьовнадихъ галаз пуд хциз тербия гана, чlехи авунва. Чlехи кьве хва тежриба кlватlзавай духтурар я, гъвечlи хци гьеле мектебда кlелзама.
Хийир Тагьирович Абдулкеримова медицинадин илимрин кандидатвилин диссертация 1996-йисуз Санкт-Петербургдин С.М.Кирован тlварунихъ галай Военно-медицинский академияда ва докторвилин диссертация 2003-йисуз Санкт-Петербургдин И.П.Павлован тlварунихъ галай медицинадин госуниверситетда хвена.
Россиядин оториноларингологрин илимдин кlватlалдин президиумдин член, и рекьяй Свердловский областдин ва Уралдин кьилин пешекар, Свердловский областдин здравоохраненидин министерствода оториноларингологиядин рекьяй медицинадин къуллугъчияр аттестация авунин комиссиядин председатель, гьа и пешедай РФ-дин Минздравдин бюродин член, Свердловский областдин патай Вирироссиядин “Объединение ЛОР педиатров” жемиятдин ассоциациядин член я.
Гьазурайди — Куругъли Ферзалиев
