Алатай гьафтеда Кьурагь районда волейболдай генерал Къагьриман Муьгьуьдинован экуь къаматдиз бахшнавай турнир кьиле фена. “Лезги газетдиз” муниципалитетдин администрациядин пресс-къуллугъди хабар гайивал, акъажунар “Кьурагь райондин агьалийрин арада тирякдиз акси таблигъат тухун” программадин сергьятра аваз тешкилнавай.
Кьурагьрин хуьруьн спортдин комплексда кьиле фейи турнирдин нетижайралди, 1-чкадиз “Кьурагь” команда лайихлу хьана. 2, 3-чкаяр “КIири” ва “Ветеранар” командайри кьуна.
Гъалибчийриз медалар, грамотаяр, спортдин пишкешар гана. Турнирдин спонсор Насими Назаралиева кIвенкIвечи чкаяр кьур командайриз вичин патай пулдин пишкешарни гана.
Акъажунра виридалайни хъсандиз къугъвайди яз Назир Мирзоев хкяна. Ам райондин образованидин къуллугъчийрин профсоюздин председатель Нажмудин Эмиралиеван патай пулдин пишкешдиз лайихлу хьана.
Къейд ийин хьи, лезги халкьдин кьегьал хва генерал Муьгьуьдин Къагьриманован экуь къаматдиз бахшнавай турнир 7-сеферда кьиле фена.
«Лезги газет»
