Республикадин электросетрин къурулушдал ацалтзавай гуж алатай йисуз саки 12 процентдин артух хьана
Дагъустандин электросетрин къурулушдин асул месэлайрин арада ам гьалдай акъатун (яни куьгьне хьун), вилик тухун патал бес кьадар инвестицияр тахьун, агьалийри электроэнергия ишлемишунай вахт-вахтунда пул тагун ава. Ихьтин шартIара адавай алай аямдин вири истемишунриз жаваб гуз жезвач.
РД-дин энергетикадин ва тарифрин министр Ризван Мурадова гьисабзавайвал, республикадин электросетрин объектар цIийикIа туькIуьр хъувун патал, гьич тахьайтIа, 80 миллиард манат пул герек жеда. Адан гафаралди, республика электричестводалди таъминарунин ери хкажунин жигьетдай кардик квай программаяр са акьван чIехибур туш: абуру ихтилат физвай хиле авай бязи месэлаяр гьялдай мумкинвал гузватIани, санлай къурулуш пис гьалда амукьзава.
Виликдай “Дагэнерго” компаниядин пресс-къуллугъди хабар гайивал, 2022-2023-йисара электросетдин къурулушда кьиле тухудай ремонтдин кIвалахриз 1 миллиардни 77 миллион манат пулунин такьатар чара авунва. Вилик йисарив гекъигайтIа, и рекъем са шумуд сеферда гзаф я.
“Гьа са вахтунда, республикада электроэнергиядикай менфят къачунин кьадар гзаф хьанва. И кардин гьакъиндай “СО ЕЭС” АО-ди раижнавай делилри шагьидвалзава”, — лагьана Р.Мурадова.
Мисал яз, алай йисан сентябрдин вацра Дагъустанда 528,5 млн кВт/сят электричество ишлемишнава. Алатай йисан гьа и вацрав гекъигайтIа, и рекъем 7,9 процентдин хкаж хьанва. Им рекорд я. Сентябрдал къведалди виридалайни гзаф электричество ишлемишай варз июль яз гьисабзавай.
“Санлай къачурла, республикадин электросетрин къурулушдал ацалтзавай гуж алатай йисуз саки 12 процентдин артух хьанва. Вилик йисара лагьайтIа, и рекъем 5-6 процентдилай виниз хкаж жезвачир”, — къейдзава РД-дин энергетикадин ва тарифрин министрди.
Р.Мурадован фикирдалди, республикада авай электростанцийрин кьадарни тIимил я. Мисал яз, 2021-йисуз Дагъустандин электростанцийри регионда электроэнергиядин жигьетдай авай игьтияж анжах 63 процентдин таъминарна. Министрди гьисабзавайвал, ихьтин гьалари экономика вилик финизни манийвилер гун мумкин я.
“Туризмдин цIийи объектар, кластерар, яшайишдин цIийи кIвалер пайда хьуни, агьалийри къвердавай гзаф электроэнергиядикай менфят къачуни регионда энергетикадин цIийи объектар эцигун, куьгьне хьанвайбур цIийикIа туькIуьр хъувун истемишзава. Зи фикирдалди, энергетика инвестицийрин климатдин диб я”, — лугьузва Р.Мурадова.
Са гафуналди, республикадин энергетикадин хилез алава инвестицияр желбдай мумкинвилер гудай цIийи механизмаяр кардик кутуна кIанзава. Гьа са вахтунда агьалияр патал электроэнергиядин жигьетдай кардик квай тарифрин кьадар хкажуниз рехъ гана виже къведач.
Натали Гьажиева
