Алатай гатуз Кьиблепатан Да­гъустандин аялрин виридалайни гуьрчег бахчайрикай сада мектебра кIелзавай 40 аялди пулсуздаказ кьве гьафтедин вахтунда ингилис чIал чирна. И кар ДГПУ-дин студенткади­ ва адан волонтерри “ЧIа­ла­рин ла­герь Mountain Camp” про­ектдин сергьятра аваз кьилиз акъуд­на.

2021-йисан майдиз  педвуздин студентка  Етара  Мирзеханова  неинки Вирироссиядин “Гележегдин муаллим. Студентар” конкурсда гъалиб хьана,  гьакIни  Жегьилрин  проектрин вирироссиядин конкурсдин (ВКМП) сергьятра аваз адан проектдиз финансарни чара ­авуна.

ВКМП социальный проектрин грантрин конкурс я. Ана Етара Мирзехановади Дагъустандин мектебра кIелзавай ба­жарагълу аялар патал чIаларин ­ла­гердин проект майдандиз ­акъудна.

Проектдин сергьятра аваз ла­герда чирвилер къачузвай вахтунда аялар мектебдилай къерехдай ингилис чIалал машгъул тир,  абуру бажарагълубурун конкурсар тешкилна, къецепатан уьлквейрин культурайрикай чирна. Абурув гьатта эхиримжи паю­на чпи хкягъай уьлквейрин сер­­ти­фикатар-паспортар агакьна.

И проектдин тереф Каспий гьуьлуьн къерехда  авай ва Россиядин мулкунал алай тек сад тир субтропикрин сармашухдин Са­мурдин тамун юкьва авай “Са­­мур”­ лагердин руководстводи хвена.

Чна умуд кутазва хьи, ихь­тин­ проектар Дагъустанда  мадни гзаф ва  идалай кьулухъ республикада неинки спортдин, гьакI­ни образованидин рекьяй лагерар пайда жеда.

Чи мухбир