И мукьвара Бикеханум Алибеговадин кьве ктаб санал чапдай акъудна. Абурукай сад — “Гатфарин мани” — шииррикай ибарат я. Кьвед лагьай ктаб — “КIвализ рехъ” — гьикаятдин эсеррикай туькIуьрнава. И ктабра гьатнавай эсерра, автордин уьмуьрдин рекьерин делилар гьатунихъ галаз сад хьиз, адан рикIин къалабулухдин гьиссерини еке чка кьазва. Лагьана кIанда, Бикеханум гьам шииратдин, гьам гьикаятдин эсеррани кIелзавайбур патал ачух я. Ада вичин гьиссер чал мердвилелди ихтибарзава. За кьатIайвал, им автордин хатIунин кьетIенвал я.
Бикеханум Алибеговадихъ лугьудайвал, чIехи тIварар ва чинер авач, амма адан ктабри ам машгьурзава. Бязи эсерар туькIуьр хьуниз зайиф ятIани, автор кIелзавайбурув вичин таъсирлу образар, руьгьдин къалабулух агакьариз алахъзава. За гьисабзавайвал, им гьар са шаирдивай ва гьикаятчидивай кIелзавайбуру ийизвай сифтегьан истемишунни я. Эсерар авахьна физвай михьи циз ухшар я. Абура автордин гьам гъвечIи ва гьам чIехи ватандин руьгь ва къамат ава.
Къейд ийин хьи, Бикеханум Алибеговадин юбилейдин вилик акъуднавай кьве ктаб автордин руьгьдин кьве лув хьиз я. Къуй ви лувари вун мадни цIийи агалкьунрихъ тухурай.
Лаура Агъаларова, литературовед
