Шак фенвайди кьуна
Алай йисан 20-ноябрдин йифен береда Къаякент райондин полициядив и хуьре 18 йисан яшда авай чкадин агьалиди къалмакъал акъатай вахтунда вичин хуьруьнви чукIулдалди яна кьена лагьай нагьакьан хабар агакьна. Идакай РД-дин МВД-дин пресс-къуллугъди хабар гана.
Жегьилди хуьруьнвидал чукIулдин 4 хер авуна. Нетижада 19 йисан яшда авай жегьилди агьвалат кьиле фейи чкадал чан гана.
Полициядин къуллугъчияр тади гьалда чкадал фена ва чарасуз крар кьилиз акъудна. Тахсиркарвал кьиле фейи чкадилай чукIул жагъана.
Къайдаяр хуьдай органрин къуллугъчийри тахсиркарвал авунай шак физвайди кьуна ва полициядин отделдиз хкана. Шак фенвайда ихтилат авурвал, къалмакъал хьунин себеб кьейи жегьилди адан мукьвабурухъ галаз къайивилер авун тир. Телефондай рахунар хьайи вахтунда абуру сада муькуьдаз намусдик хкIадай гафар лагьана. Кьилди гуьруьш хьайи вахтундани абуру чпи чпиз нагьакьан гафар лугьун давамарна. И макъамда рикIе чIуру ният авайда вичив гвай чукIул акъудна ва жегьилдал хирер авуна.
Полициядин къуллугъчийри кIватIнавай материал Россиядин СУ-дин Дагъустандин силисдин комитетдив вахканва.
Къарши рекьиз экъечIна
Алай йисан 11-ноябрдин йифен вахтунда Дербент райондин сергьятра “Кавказ” шегьредал “ВАЗ-21099” машин гьалзавай 19 йисан яшда авай Кьурагь райондин агьали улакьар къвезвай къарши рекьиз экъечIна ва Акуша райондай тир 41 йисан яшда авай агьалиди гьалзавай “Камаз-да” акьуна. ДТП-дин нетижада “ВАЗ-21099” гьалзавайди ва адан кьве пассажир (20 ва 24 йисан яшара авай жегьилар) беденриз гзаф хасаратвилер хьуникди агьвалат кьиле фейи чкадал кьена. Суд-силис авун патал материал кIватIнава.
МВД-дин пресс-къуллугъди улакьар гьалзавай вирибуруз мукъаятвал квадар тавуниз, рекьера гьерекат авунин къайдайрал амал авуниз эвер гузва.
Электроэнергия чуьнуьхна
Дербентда полициядин къуллугъчийри къанунсуздаказ объект электросетрик кутунвай дуьшуьш дуьздал акъудна. Дагъустандин МВД-дин УЭБиПК-дин къуллугъчийрин майнинг-ферма тешкилнавайди яз 41 йисан яшда авай чкадин агьалидал шак физва.
Тайинарнавайвал, агьали рекъемрин валюта акъудунал алай йисан 23-августдилай машгъул хьана. Ада гараждин кIаник квай подвал махсусдаказ тадаракламишнавай.
Вичин кар кьилиз акъудун патал ада гьахъ-гьисабунин приборар галачиз электричестводин линийрик кутуна, вичин подвалда авай тадаракрихъ гилигна. Тадаракламишнавай чкадай криптовалюта арадал гъидай 12 аппарат вахчуна. Экспертизади электросетдин тешкилатдиз хьанвай зарардин кьадар тайинарзава. И делилдай суд-силис авун патал материал кIватIнава.
«Лезги газет»
