Мукьвара ХМАО-дин Нефтеюганскдин райондин Пойковское поселокда РФ-дин азаддиз кьуршахар кьунай кардик квай Федерациядин вице-президент Владимир Семенован пишкешар патал международный дережада аваз азаддиз кьуршахар кьунай турнир кьиле фена. Ана Урусатдин регионрайни къецепатан уьлквейрай 130-дав агакьна спортсменри иштиракна.
“Лезги газетдиз” РД-дин спортдин ва физический культурадин министерстводин пресс-къуллугъди хабар гайивал, иштиракчийрин арада Дагъустандин векиларни авай. Санлай къачурла, абуру 11 медаль къачуна: 4 — сад, 2 — кьвед ва 5 пуд лагьай чкайринбур.
1-чкайриз лайихлу хьайибурун арада Абубакар Муталиев, Рамазан Ферзалиев, Даурен Куругълиев ва Мегьамед Къурбанов ава. Муса Мегьтихановани Аманула Гьажимегьамедова 2-чкаяр кьуна. Динислам Тахтаров, Ибрагьим Ибрагьимов, Магьама Дибиргьажиев, Арсен-Али Мусалалиев ва Сайпудин Мегьамедов хайи республикадиз буьруьнждин медалар гваз хтана.
***
Мегьарамдхуьруьн райондин Бут-Къазмайрин ДЮСШ-да спортдал машгъул жезвай Ислам Ширинова и йикъара Кабардино-Балкарияда “Кубок Вызова” лишандик кваз дзюдодай кьиле фейи международный турнирда 3-чка кьуна.
Мегьарамдхуьруьн райондин администрациядин пресс-къуллугъди хабар гузвайвал, акъажунра Урусатдин 27 региондай ва Эрменистандай, Монголиядай, Тажикистандай, Къазахстандай, Белоруссиядай, Азербайжандай, Къиргъизистандай атанвай жаванри иштиракна. Санлай къачурла, абурун кьадар 1000-далай алатнавай.
***
11-ноябрдиз СтIал Сулейманан районда спортдин цIийи кьве майдан ачухуниз талукьарнавай мярекатар кьиле фена. Муниципалитетдин администрациядин пресс-къуллугъди хабар гайивал, Герейханован хуьре спортдин майдан — “Местные инициативы” проектдин, ДаркIуш-Къазмайрин хуьре “Успех каждого ребенка” проектдин сергьятра аваз эцигна.
Къейд ийин хьи, майданар ачухуниз талукьарнавай мярекатра райондин кьил Саид Темирхановани иштиракна. Ада республикадин кьиле авайбуруз сагърай лагьана.
«Лезги газет»
