Донбасс хуьн патал военный махсус серенжемда Россиядин Федерациядин Яракьлу Къуватрин аскеррин игитвилерикай оборонадин министерстводин пресс-къуллугъди­ хабарар гун давамарзава. Мулкар азад авунин женгера жуьрэтлувал ва игитвал къалурзавайбурун арада дагъустанвиярни ава. Абурукайни сад Мегьарамдхуьряй тир гвардиядин лейтенант, взводдин командир  Исмаил  Мегьамедов  я.

Вичин танкунаваз фидайла, лей­тенант Мегьамедоваз Украинадин боевикар акуна. Россиядин офицерди  душ-мандин къуватрин гьахъ-гьисаб чирна, абурал гьужумна. Са куь­­руь вахтунда кьиле фейи женгина миллетбазар тергна­.

Мадни виликди финалди, лейтенант Мегьамедова вичин гъилик квай ас­ке­рарни галаз цIийи районда сенгер кьуна. Гьа са вахтунда мукьув гвай хуьр азад авун патал серенжемарни кьа­булна.

Россиядин Яракьлу Къуватрин кьушунрин гьужумдиз манийвал авун патал миллетбазри Исмаил Мегьамедова кьунвай ­сенгеррал гьужумна ва минометрай, акъваз тийиз,­ гуьлле гана. Ихьтин гьал акурла, гвардиядин лейтенантди вичин взвод душмандин ягъунрикай саламат чкадиз акъудна. ЯтIани Исмаил Мегьамедован гъилихъ гуьл­ле галукьна. Ада вичин хер хьанвай чка ку­тIунна ва аскерарни галаз душмандал гьужумна. Нетижада хуьр боевикрикай азадна.

Махсус серенжем кьиле тухудайла къалурай жуьрэтлувиляй ва игитвиляй гвар­диядин лейтенант Исмаил Мегьамедоваз “Жуьр­этлувилин” орден гана.

Дагъустан Республикадин Кьил Сергей Меликова вичин телеграм-каналда чи ватан­эгьли Исмаил Мегьамедован игитвилиз баянар гана. “Чи кьегьалри, командиррин тапшуругъар кьилиз акъуддайла, чпин лап хъсан ери­яр къалурзава. Мегьарамдхуьряй тир жегьил Исмаил Мегьамедован игитвиликай Россиядин оборонадин министерстводи суьгьбетна.

Гвардиядин лейтенантди неинки уьтквемвилелди, гъавурда аваз Украинадин миллетбазрихъ галаз женг чIугу­на, гьакI вичин гъилик квай аскерарни душмандин гуьллейрикай къутармишна. Хьанвай залан хирезни килиг тавуна, ада хуьр азад авун патал гьужум давамарна. Гьавиляй адаз “Жуьрэтлувилин” орденни ганва.

Чи улу-бубайрин ва бубайрин лайихлу крар давамарзавай халисан ватанпересар тир Исмаилаз ва амай кьегьал рухвайриз за сагърай лугьузва. ВикIегьвилелди, намуслувилелди Ватан хуьзвай куьн алай аямдин игитар я!”, — кхьенва региондин Кьили.

* * *

Жергедин аскер  Камил  Гьасанова  гьужумдиз физвай чи подразделенияр герек суьрсетдалди таъминарунин тапшуругъ кьилиз акъудзавай. Чи частарив герек вири шейэр, тадаракар, яракьар агакьаруниз манийвал гунин мураддалди миллетбазри Камил Гьасановни авай колоннадал гьужумна. Лап патав хьиз хъиткьинай тупунин гуьлледикди­ Гьасанован автомобиль къайдадикай хкатна. Гьасятда машиндай эвичIна, Камила миллетбазриз вичив гвай яракьдай гуьлле гана. Гъиле-гъил аваз ада кьуд боевик тергна. Душ­мандин гьужум алудайла, Камил Гьа-са­­нова вичин автомобиль туькIуьр хъувуна ва тайин­ тир райондиз суьрсет, яракьар агакьарна.

Хийир Эмиров