2022-йисан 14-ноябрдиз сиясатдин ва жемиятдин тIвар-ван авай деятель, журналист, Дагъустандин госуниверситетдин преподаватель, РД-дин Халкьдин Собранидин депутат Ильман Субгьанович Алипулатов садлагьана рагьметдиз фена.

Ильман Субгьанович журналистрин “куьгьне школадин” векилрик акатзавай, инсанрин гьалар рикIивай гьиссзавай, республикада ва уьлкведа кьиле физвай жемиятдинни сиясатдин гьаларин гъавурда авай пешекар тир. Адаз кIвалахдин юлдашрин, дустарин ва ватанэгьлийрин арада еке гьуьр­мет авай.

И.С.Алипулатов 1954-йисан 28-февралдиз До­къузпара райондин Гарагърин хуьре дидедиз хьана. Лап хъсандиз кIелуналди Дагъустандин госуниверситетдин юридический ва Даггоспединститутдин филологиядин факультетар, международный управленидин институт, аспирантура акьалтIарна. Ам филологиядин илимрин кандидат, Европадин тIебии илимрин академиядин гьакъикъи член, гьа и академиядин Дагъустандин отделенидин кьилин ученый секретарь тир.

И.Алипулатова ДАССР-дин министррин советдин телевиденидин ва радиовещанидин рекьяй комитетдин редакторвиле (1977-1985-йисар), телевиденидин ва радиовещанидин госкомитетдин “Махачкъаладин 7 югъ” информациядин программадин старший редакторвиле (1985-1989), Дагъустандин гостелерадиодин яратмишунин “Эфир”  объединенидин кьилин редакторвиле — директорвиле (1989-1992), “Дагъустан” гостелерадиокомпаниядин кьилин редакторвиле (1992-1994) кIвалахна. 2005-йисалай ада Дагъустандин госуниверситетдин телевиденидин ва радиовещанидин кафедрадин заведующийдин везифаяр тамамарзавай. Ам гьакI «Дагъустан» ГТРК-дин информациядин жемиятдинни сиясатдин вещанидин сад авунвай дирекциядин председателдин заместителни тир.

И.С.Алипулатов РФ-дин МедиаСоюздин Да­гъус­тандин отделенидин председатель, Россиядин халкьдин фронтдин  РД-да авай региональный отде­ленидин сопредседатель, РД-дин общественный па­латадин член, “Дагъустан” ВГТРК-дин жемиятдинни сиясат­дин телевиденидин руководитель, РД-дин здравоохраненидин министерстводин ОС-дин президиумдин председатель, “Ихтиярар ва лайихлу­ уьмуьр патал тир юристар” жемиятдин организациядин региональный отделенидин председатель тир.

Ада яргъал йисара чIугур зегьмет лайихлувилелди къейдни авунвай. И.Алипулатов Россиядин Федерациядин ва Дагъустан Республикадин культу­радин лайихлу работник тир. Адаз “Дагъустан Республикадин вилик ла­йихлувилерай” ва “Дагъустандин намус ва да­мах — Къизилдин лекь” орденар ганвай. Ам Ма­хачкъала шегьердин, Мегьарамдхуьруьн, До­къузпара, Ахцегь, Рутул, Къули районрин гьуьрметлу агьали тир. Бегьерлу журналист 10-далай виниз ктабрин, илимдин ва политологиядин  250-далай виниз макъалайрин автор тир. Телевиденида ада “Акценты”, “Да­гъус­тандин халкьдин игитар”, “Кавказдин халкь­дин игитар” программаяр устадвилелди тухузвай.

Ильман Субгьановича Дагъустандин журналис­тикада 40-йисалай виниз зегьмет чIугуна. Ам телевиденидин лап хъсан  журналист тир. Адахъ галаз кIвалахай юлдашри ва ам чидай ксари Алипулатован пешедал рикI хьун, ада Россиядин ва милли СМИ-яр вилик тухуник кутур еке пай къейддай.

Ильман Субгьанович “Лезги газетдин” чIе­хи дуст­ни тир. Ам коллективдиз са шумуд­ра мугьман хьана­.

Ильман Субгьанович 15-ноябрдиз Махачкъала шегьерда вичин хтулдин патав кучукна.

“Лезги газетдин” редакциядин коллективди дериндай хажалат чIугунивди, Ильман Субгьанович Алипулатован багърийриз, мукьвабуруз ва кIва­лахдин юлдашриз башсагълугъвал гузва.