Дагъустандин парламентди 2023-йисан бюджетдиз талукь месэлаяр веревирдна акьалтIарнава, — хабар гузва РД-дин Халкьдин Собранидин пресс-къуллугъди. ЦIийи йисан бюджет 28 миллиард манатдин дефицит аваз (ихтилат адан доходрин паюнин 17 процентдикай физва) кьабулнава.

РД-дин финансрин министр Юнус Саадуеван гафаралди, 2023-йисан бюджетдин доходрин пай 163 миллиард манат жеда. Къведай йисуз образованидин, здравоохраненидин ва яшайишдин сиясатдин хилериз чара ийидай такьатри, санлай къачурла, 125 миллиард манат (харжийрин паюнин саки 65 процент) тешкилда.

Министрди гьакIни къейд авурвал, къведай йисуз бюджетдин идарайра кIвалахзавайбуруз гудай мажибрин фондуниз ахъайзавай пулдин кьадар, 2022-йисав гекъигайтIа, 6,7 миллиард манатдин артух жеда. Яшайишдин месэлаяр гьялуниз бюджетда иллаки кьетIен фикир ганва. Мисал яз, етим аялар кIвалералди таъминаруниз 779 миллион манат фикирда кьунва. Дагъустандин агьалийрин бязи категорияр пулсуздаказ  дарманралди таъминаруниз 2,3 миллиард манат харжда.

«Лезги газет»