15-ноябрдиз РД-дин Кьил Сергей Меликова Оперативный штабдин ва республи­кадин призывдин комиссиядин саналди тир заседание кьиле тухвана. Анал 2022-йисан 19-октябрдиз РФ-дин  Президентди­ акъуднавай “Россиядин Федерациядин субъектра тамамарзавай серенжемрин гь­а­къиндай” Указда къалурнавай серенжемар уьмуьрдиз кечирмишзавай гьал ва мобилизация авунвайбурун, гьакI­ни махсус операцияда иштиракзавай гуь­гьуьл­лубурун хизанриз яшайишдин ре­кьяй­ куьмек гуниз талукь серенжемар вере­вирдна. Идан гьакъиндай редакциядиз РД-дин Кьилин  пресс-къуллугъди хабар гана.

Мярекатдал военный къуллугъдал тамам тушир мобилизация авунвай ва махсус военный серенжемда гуьгьуьллувилелди иштиракзавай агьалийрин хизанриз тайинарнавай яшайишдин рекьяй куьмек гунин месэладихъ галаз сад хьиз рес­публикада зулун призывдиз жегьилар желбзавай гьалдикайни ихтилат фена.

Кар алай месэлайрив эгечIдалди, Сергей Меликова Каспийск шегьердин агьалияр “Зегьметдин баркалладин шегьер” гьуьрметдин тIвар гунихъ галаз ала-къалу яз тебрикна.

РД-дин Кьили рикIел хкана хьи, Россиядин Федерациядин Президентдин Указдин бинедаллаз 1941-1945-йисарин Ватандин ЧIехи дяведа Гъалибвал къазанмишуник шегьердин агьалийри еке пай кутунай, промышленностдин карханайри акъвазунар авачиз военный ва гражданвилин продукция акъудунай, зегьметда акьалтIай кьегьалвал къалурунай Каспийск  шегьердиз  “Зегьметдин  баркалладин  шегьер”  лагьай тIвар ганвайдакай лагьана.

Ихьтин гьуьрметдин тIвар гьакIни Аст­рахань, Вологда, Горловка, Златоуст, Луганск, Норильск, Орск ва Якутск шегьерризни ганва.

Тамам тушир мобилизация авунвайбурун ва гуьгьуьллубурун хи­зан­риз яша­йишдин рекьяй куьмек гун патал алава серенжемрикай региондин зегь­мет­дин ва яшайишдин рекьяй вилик финин министр Абдурагьман Магьмудова малумат гана.

Ада лагьайвал, республикада са се­фер­да гудайди яз 100 агъзур манат тайинарнава. И кьадар пул яшайишдин маса жуь­ре­дин куьмек кIанзавайла, хизанрин гьар са касдал ацалтзавай юкьван мажиб тайи­нар­дайла, гьисабзавач. Алава серенжемар уьмуьрдиз кечирмишун патал РД-дин­ гьукуматди 350 миллион манат чара авунва. Къенин йикъалди арзаяр кхьенвай 2251 касдив са сеферда гудай пул агакьна­ва.

Идалайни гъейри, мобилизация авунвай ва гуьгьуьллу агьалийрин аялриз Да­гъустандин халкьдин майишатдин университетда бюджетдин гьисабдай кIелдай мумкинвал гузва. Гьа са вахтунда рес­пуб­лика­дин образованидин идарайри мобилизация авунвай ва гуьгьуьллу агьалийрин хизанар бахчайра, школайра аялрихъ гелкъуьнай ва кIелунай пулар къачуникай азадзава. ГьакIни абуруз, кIва­лах­дал акъваздайла, куьмек гуда, налогрин жигьетдай са бязи кьезилвилер ийида.

Министрди лагьайвал, мобилизация авунвай ва гуьгьуьллу агьалийрин хизанриз дуланажагъдин, яшайишдинни медицинадин, психологиядин, педагогикадин ва правовой рекьяй игьтияж авайбурузни куьмекар гуда.

Абдурагьман Магьмудова къейд авурвал, яшайишдин рекьяй къуллугъар авунин мураддалди мобилизация авунвай   ва гуьгьуьллу агьалийрин хизанрихъ яша­йишдин къуллугъчияр галкIурнава. Абурун суалриз, арзайриз жавабар гудай линияни кардик кутунва.

Региондин Кьили республикада и жигьетдай тухузвай кIвалахдиз разивилин къимет гана. Гьа са вахтунда, ада авай мум­кинвилериз килигна, гьар са хизан ге­рек шейэралди таъминарна кIанзавай­да­кай лагьана.

“Бюджет кьабулдай вахтунда резерв­дин пуларин кьадар фикирда кьуна кIан­да. Военный серенжемда иштиракзавай ксарин хизанриз вахт-вахтунда куьмек гуз жедайвал, резервдин фондуниз датIана пулар чара авун лазим я. Алай вахтунда и кар хъсандиз тешкилнава ва кьиле тухузва. Гьа жергедай яз — чи муниципалитетрини. Заз къе Табасаран, Мегьарамдхуьруьн, Тарумовский, Къизляр, Казбек рай­онрин ва Дербент шегьердин администрацийрин кьилериз сагърай лугьуз кIанзава”, — къейдна Сергей Меликова.

Зулун призывдин кампаниядикай  рахуналди, региондин Кьили къейдна хьи, Дагъустанда и серенжем тешкиллувилелди кьиле физва. Лап хъсан нети­жаяр СтIал Сулейманан, Кьурагь, Тарумов­ский, Ногъай, Къайтагъ, Дахадаевский рай­он­рихъ ва Каспийск шегьердихъ ава. 1-но­­­ябр­­­дилай и муниципалитетра армиядиз ­тухвана кIанзавайбурун 50 процент желб­нава.

Дагъустандин Кьили гьакIни рикIел хкана хьи, тамам тушир мобилизациядихъ галаз зулун призывдин са алакъани авач. Армиядиз эвер гузвай жегьилар Дон­бассдиз, Запорожьедин ва Херсондин областризни ракъурзавач.

Хийир Эмиров