РФ-дин Гьукуматдин Председатель Михаил Ми­шус­тина акъуднавай къарардал асаслу яз, тамам тушир мо­­билизациядин сергьятра аваз военный къуллугъдал эвер ганвай ватандашрин хизанриз яшайишдин рекьяй куьмекар гудайла, абурун игьтияжлувал фикирда кьадач.

Гьа икI, игьтияж авай хизанрив яшайишдин рекьяй талукь куьмекар гьа виликан саягъда агакьда. Государстводин куьмек гьар хизанэгьлидал регионда тайи­нарнавай яшамиш хьунин агъа кIанин кьадардин такьа­тар гьалт тийизвай хизанриз талукь я.

Ихтилат куьмекдин ихьтин серенжемрикай физва:

— кIвачел залан хьайи эвел кьилера учетда акъ­вазнавай дишегьлийрин пособие;

— 3-7 ва 8-17 яшара авай аялриз гьар вацра гузвай пулунин такьатар;

— сад ва я кьвед лагьай аял хьунихъ ва я веледвиле кьабулунихъ галаз алакъалу такьатар;

— яшайишдин икьрар.

БТИ-дай справка

Яшамиш жедай хсусият ава ва я авач лагьай справка­ кIанзаватIа, квевай ам МФЦ-дин идарадай къачуз жеда.

ТIвар кьунвай справка са тайин кьезилвилер хьун ва я яшамиш жедай кIвалер къачунин нубатда акъвазун­ патал государстводин жуьреба-жуьре органриз фейила, герек жезва.

Регистрация авунвай чкадилай аслу тушиз, БТИ-дай гузвай справка къачун патал арза гваз МФЦ-дин гьар гьи идарадиз фейитIани жезва. МФЦ-диз фидайла, жував ихьтин документар хьана кIанда:

— паспорт;

— эгер ватандашдин патахъай адан векил фейитIа, адав доверенность хьун чарасуз я;

— эгер справка диде-бубайри ва я тамам яшарихъ агакь тавунвай аял веледвиле кьабулнавайбуру истемишиз хьайитIа, хайивилин ва я веледвиле кьабулнавайвилин шагьадатнама. 

Справка гунин къуллугъ 5 йикъан муддатда кьилиз­ акъудзава. Диде-бубайриз ва я 14 йисал кьван яшара авай аялриз и справка гунин къимет 500 манат я.

Аялрин бахчадин нубат

Аял бахчада тайинарун патал диде-бубайри виликамаз къайгъу чIугун герек я. Яшамиш жезвай кIвалин патавай яргъа тушир аялрин бахчада тайинарун патал нубатда акъвазна кIанзава. И кар агьалийривай МФЦ-дин идарайра кьилиз акъудиз жезва. Диде-бубайри арза вугун ва ихьтин документар къалурун герек я:

— диде-бубадикай садан паспорт;

— аял хайивилин гьакъиндай шагьадатнама;

— хизан кьезилвилер (льгота) талукьди я лагьана тестикьарзавай документ (аваз хьайитIа).

Мад а кар фикирда кьун чарасуз я хьи, эгер диде-бубайрихъ яшамиш жезвай чкада прописка авачтIа, гьана яшамиш жезва лагьай справка къалурна кIан­зава.

«Лезги газет»