СтIал Сулейманан тIварунихъ галай райондин ва Лезгийрин музыкадинни драмадин театрдин арада, ХХ асирдин Гомеран тIварцIи сад-садаз мукьва авуна, дуствилин алакъаяр аваз гзаф йисар я. Эхь, республикада гьар са рекьяй вилик жергейра авай муниципалитетни, лезгийрин дамах ва даях тир театрни Дагъустандин халкьдин шаир СтIал Сулейманан тIварунихъ гала.

Муниципалитетдин руководстводин теклифдалди и йикъара Кьасумхуьрел Лезгийрин­ музыкадинни драмадин театрдин артистрин чIехи десте мугьман хьана. Абуру райондин медениятдин маканда сифтедай гъвечIи тама­шачийриз -1-4-классра кIелзавай аялриз Д.По­низован пьесадин бинедаллаз сегьнеламишнавай “Храброе сердце, косые глаза” хкет-та­маша къалурна. Райондин образованидин управлениди хабар гайивал, тамашадиз “Пушкинан картадай” ва райондин администрациядин такьатрин гьисабдай умуми образованидин 13 школадай аялар атанвай.

Югъ нисинилай алатайла, И.Тагьирован тIварунихъ галай медениятдин макандин 420 чка авай гегьенш зал чIехи яшарин тамашачийрив ацIана. Абуруз театрдин артистри Идрис Шамхалован пьесадин бинедаллаз Да­гъус­тан Республикадин лайихлу артист, театр­дин кьилин режиссер Казбек Думаева эцигнавай халкьдин рикI алай “Периханум” тамаша къалурна.

Тамаша къалуриз гатIундалди вилик сегьнедиз райондин администрациядин кьилин 1-заместитель Лацис Оружев экъечIна. Ада му­ниципалитетдин кьил Саид Темирханован, ад­министрациядин ва депутатрин собранидин тIварунихъай Лезги театрдин артистар тебрикна, райондин администрациядин, агьалийрин ва театрдин коллективдин арада авай дуствилин, амадагвилин алакъайрикай лагьана.

Рахунрилай гуьгъуьниз перде ачухна, тама­ша башламиш хьана. РД-­дин­ халкьдин артистка Фаризат Зейналовади (Периханум), республикадин лайихлу артист Руслан Пирвердиева (Алихан), РД-дин халкьдин артистар тир Ибрамхалил Рамазанова (Таптугъ), Агъахан Агъаханова (чубан), гьакIни Ва­лерий Сулейманова (везир), Миясат Мурадха­новади (кьуьзуь къари) ва масабуру тамамарай ролар районэгьлийриз гзаф бегенмиш хьана­. Эхирдай абуруз цуьквер гана, гурлу капар яна.

Тамаша къалурайдалай гуьгъуьниз Кьасумхуьруьн телевиденидин кьилин редактор Эльвира Небиевади ва корреспондент Мизамудин Магьмудова халкьдиз кIани ва сейли ар­тистар тир Ибрамхалил Рамазановахъ, Фаризат Зейналовадихъ, Агъахан Агъахановахъ, Руслан Пирвердиевахъ ва Саидин Думаевахъ галаз “элкъвей стол” тешкилна. ЦIийи репертуардикай, вилик акъвазнавай везифайрикай, театрдинни райондин арада авай дуствилин алакъайрикай гегьенш рахунар авуна.

Хазран Кьасумов