Вилик йисара хьиз, цIини “Лезги газет” — гьар са кIвализ” серенжем кьиле тухузвайдакай чна хабар ганай. РикIел хкин, адан сергьятра аваз чпихъ мумкинвилер авай ватанэгьлийри хайи хуьрериз, игьтияж авай хизанриз, мектебра кIелзавай аялриз, мукьва-кьилийриз “Лезги газет” кхьизва ва идалди хайи чIал хуьник чпин пайни кутазва.
Лезги чIалахъ рикI кузвай ихьтин стхайрикай сад вичин бине СтIал Сулейманан райондин Кьулан СтIалрин хуьряй тир Разим Алифендиевич Пирмегьамедовни я. Махачкъала шегьерда яшамиш жезвай чи ватанэгьлиди “Лезги газет” — гьар са кIвализ” серенжемда иштиракиз са шумуд йис я.
ЦIини и мярекат кьиле тухузвайдакай хабар хьайила, ам чи редакциядиз мугьман хьана ва 2023-йис патал “Лезги газет” кхьиниз (110 экземпляр) 50 агъзур манат пул чара авуна.
Хайи чIал хуьник, милли газетдин тираж гзаф хьуник кутазвай лайихлу пай фикирда кьуна, редакциядин коллегиядин къарардалди кьилин редактор Мегьамед Ибрагьимова Разим Пирмегьамедовав “Лезги газетдин” — 100 йис” медаль вахкана ва адаз сагърай лагьана. Къуй адахъ чандин сагъвал, кIвалахдин рекье агалкьунар ва берекатар пара хьурай. Амин!
Агьмед Магьмудов
