Мукьвара Дагъустандин ктабрин чапха­нада муаллим, журналист ва писатель Гьажибала  Къазиеван  “Девирдин аламатар” тIвар алай ктаб (160 чиникай ибарат) чапдай акъатна. Ана гьа и тIварцIихъ га­лаз кьазвай гьикаяяр, мезелияр ва шиирар гьатнава. 300 экземплярдин кьадарда аваз акъатнавай ктабдин редактор Да­гъус­тандин халкьдин шаир Арбен Къардаш я.

Гьажибала Къазиев лезги кIелчийриз фадлай чизва. 1971-йисалай Хасавюрт райондин ЦIийи Къурушрин 1-нумрадин мектебда лезги чIаланни эдебиятдин муаллим яз зегьмет чIугвазвай ада хайи чIа­лан месэлайрай вичин фикирар мукьвал-мукьвал газетрани журналра чапзава. Ам 2019-йисуз “Мавел” чапханада акъатай “Гъетер-халкьар Къурушар” ва маса ктабрин автор, хейлин шабагьрин сагьиб я.

КIелзавайдаз иллаки “Кризис”, “Са дуьшуьш”, “Крыша”, “Пехърекай — билбил”, “Экуь хъхьай югъ” ва маса эсерри лезет гузва. Ктабдин эхирда пуд шиирни ава.

ЧIал адетдинди, гъвечIи-чIехи кIел­чияр гъавурда акьадайди я. Девирдин аламатар къалурунихъ галаз сад хьиз, авторди вичин эсерра, иллаки диалогра, чи йикъарин чIални къалурнава. “Са дуьшуьш” гьикаядай са мисал гъин.

“Яда, Мирзе, Ахцагьай хтанвай гадайрин гафарай, гьа Минскдилай хъсан къиметар авай чка авачалда. Особенно чи Дагъустандин метягьриз (товарриз), анра бес радиация яни, са вуч ятIа хьаналдай. Ша чна гьаниз гьалин чи “шивер”, ноябрдин суварарни мукьва жезва”.

Ибур гьикаядин игитдин рахунар я. Урус гафар авторди кьасухдай кутунва.

Зи фикирдалди, Гьажибала муаллимдин ктаб лезги эдебиятдал рикI алайбур патал хъсан савкьат я. Гьелбетда, къимет­ни кIелчийри чпи гуда. Чаз кIанзавайди ярат­мишунрин рекье автордихъ мадни еке агалкьунар хьун я.

К. КIелетви