СтIал Сулейманан районда авай, Урусатда виридалайни екеди яз гьисабзавай шуьмягърин багъларин майданар алай йисуз 2 агъзур гектардив кьван агакьна гегьенш жеда. 2021-йисав гекъигайтIа, и рекъем кьве сеферда гзаф хьанва. РД-дин хуьруьн майишатдин ва суьрсетдин министерстводин пресс-къуллугъди хабар гузвайвал, и хилез пешекарар желбун патал “Полоса” ООО-дин бинедал багъманчивал ва аграрийрин технологияр вилик тухудай махсус центрани арадал гъидайвал я.
Винидихъ тIвар кьур министерстводин кьилин сад лагьай заместитель Шарип Шарипован гафаралди, къенин юкъуз “Полоса” ООО-дин багъларин майданри саки 1,6 агъзур га тешкилзава, зулухъай цадай къелемар фикирда кьуна, и рекъем 2,6 агъзур гадив агакьда.
Адан фикирдалди, ихьтин чIехи проектар кьилиз акъудун патал хъсандиз гъавурда авай пешекарар герек я. И месэла гьялун патал карханадин бинедал багъманчивал ва аграрийрин технологияр вилик тухудай махсус центр арадал гъида. ООО-дин директорди пешекаррин чирвилер хкажун патал Урусатдин кIвенкIвечи вузрихъ галаз икьрарар кутIундайвал я. Идалайни гъейри, аграриядин хилен пешекаррин тежриба мадни хкажун патал абур къецепатан уьлквейризни рекье твада.
РикIел хкин, СтIал Сулейманан районда шуьмягърин багъ 2019-йисан зулухъай кутунай. А чIавуз къелемар анжах 150 гектарда цанвай. 2021-йисуз багъдин майданар 1 агъзур гектардив агакьдалди гегьенш хьана. Шуьмягърилай гъейри, “Полоса” ООО-ди ичер, чуьхверар, пIинияр, хутар, ципицIар, киви, анарар ва маса емишарни битмишарзава. Къейд ийин хьи, и кархана арадал гъанвайди Дагъустандин Халкьдин Собранидин депутат Имам Яралиев я.
«Лезги газет»
