Тамам тушир мобилизация малумарай йикъалай инихъ Украинадихъ галаз кьиле тухузвай махсус серенжемда иштиракун патал, повесткадалди эвер гайи агьалийрилай гъейри, 18 агъзурдав агакьна гуьгьуьллубурни рекье гьатна. Абурун арада Мегьарамдхуьруьн райондин Азадогъли хуьруьн администрациядин кьил Фархад Аскерович Эмирхановни ава.
Хуьруьн администрациядин кьилин къарардикай сифтедай Мегьарамдхуьруьн райондин кьил Фарид Агьмедова хабар гана:
“Къе, 27-сентябрдиз, чна Республикадин военкоматдин кIватI жедай пунктуниз Азадогъли хуьруьн кьил Фархад Эмирханов рекье туна. Ада Ватандин сенгерар хуьнин къарар гуьгьуьллудаказ кьабулнава. Гьелбетда, за адан и къарардин тереф хвена ва им игитдин къарар яз гьисабзава! Жегьилар патал чешне тир адазни, амай вири гадайризни заз гъалибвал гваз ва сагъ-саламат яз чпин кIвалериз, хизанрин патав хтунин алхишар ийиз кIанзава”.
Дагъустандин хуьрерин администрацийрин кьилерин везифаяр тамамарзавай къуллугъчийрин арада гуьгьуьллудаказ мобилизациядин гьерекатдик экечIай пуд касдикай сад тир Фархад Эмирханован жуьрэтлувиликай, намуслувиликай республикадин СМИ-рани къейднай.
Алай вахтунда Фархад Аскеровича СВО кьиле тухузвай мулкунал вичин хиве тунвай везифаяр тамамарзава. Адахъ галаз суьгьбетдайла, гьелбетда, зи кьилиз атай сифтегьан суал сад тир: хуьруьн администрациядин кьил яз, аниз тефидай законлу себеб аваз, ихьтин къарар кьабулдай фикирдал вун гьикI атана?.
— Чи хуьрерай гзаф гадайриз повесткаяр атана. Абурун арада гьар жуьрединбур авай — викIегьбурни, дирибашбурни, гьа са вахтунда кьил къакъудиз кIанзавайбурни, масанрихъ фейибурни. И гьалар акурла, тамам тушир мобилизация малумарайдалай кьулухъ сифтегьан йикъара зун СВО-дин мулкунал гуьгьуьллудаказ финин фикирдал атана. ГьикI лагьайтIа, четин вахтунда эркекри чеб акI тухун лазим туш. Чун тефейла, бес вуж фирай? Дишегьлийри хуьдани Ватан? Идалайни гъейри, жуван къарардалди заз чиновникарни и кардивай къерех тахьанвайди, уьлкведа важиблу месэлаяр виридаз сад хьиз талукь тирди къалуриз кIанзавай. Мад са карди зун жуван фикирдал кIеви авуна — а йикъара Ижевск шегьердин мектебрикай сада аялриз гуьлле гунин мусибат арадал атанай… Са гафуналди, зун гуьгьуьллудаказ СВО-диз фидай къарардал атана. Гьа икI, исятда зун ина ава ва, дуьз лагьайтIа, гьич са зеррени и кардал пашман туш”, — лугьузва Ф.Эмирханова.
Къейд ийин, Фархад Аскерович алакъадин такьатрин промышленностдин пешекар, Дербентдин “Волна” НИИ-дин кар алай инженер, къенепатан алакъадин гележег авай такьатар туькIуьрунин карда кьилин конструктор хьайи, вичин идарадик кваз алай аямдин рекъемрин АВСА системаяр туькIуьрунин кIвалах тухвай ва общественный кIвалахра активнидаказ иштиракай рагьметлу Аскер Эмирханович Эмирханован хва я. Халкьдин къулайвал, Ватандин аваданвал патал ада тамамарай баркаллу крарикай “Лезги газетда” алатай йисан майдиз макъала чапнай. Бубадин намуслу рехъ, малум жезвайвал, адан хци лайихлудаказ давамарзава.
“Чи гьалдикай хабар кьазвай, чаз куьмек гузвай вири ксариз военный вири къуллугъчийрин патай рикIин сидкьидай сагърай лугьуз кIанзава. Инанмиш я: душмандин ниятар кьилиз акъатдач ва гъалибвал чи пата жеда, чи балаяр ислягь ва саламат дуьньяда яшамиш жедайвал. Къуй дуьньяда ислягьвал хьурай!” — лагьана Фархада суьгьбетдин эхирдай.
Чнани Фархадаз ва алай вахтунда военный серенжемда иштиракзавай, Ватандин сенгерар хуьзвай вири аскерриз чпин балайрин, багърийрин патав сагъ-саламат яз хтун алхишзава.
Жасмина Саидова
