8-ноябрдиз “Дагестанская правда” газетдин редакцияда кьиле фейи пресс-конференциядин сергьятра аваз РД-дин здравоохраненидин министр Татьяна Беляевади республикадин СМИ-рин векилрин суалриз жавабар гана.
Мярекатдал веревирд авур асул месэлаяр Дагъустанда кьилиз акъудзавай “Модернизация первичного звена здравоохранения” программадихъ галаз алакъалубур тир.
Т.Беляевади хабар гайивал, и программа республикада кардик кваз кьвед лагьай йис я. Министрдин гафаралди, хуьруьн чкада авай здравоохраненидин объектрин 50 процент куьгьне хьанва. ФАП-рин саки 6 процент кирида кьунвай дараматра ава. ТIвар кьунвай программадин куьмекдалди асул гьисабдай хуьрера цIийи ФАП-ар эцигзава, абур герек тир тадаракралди таъминарзава. Мисал яз, алай йисуз программадин сергьятра аваз медицинадин тадаракрин 379 уьлчме маса къачунва. Азарлуяр духтурханайриз ва я духтурар азарлуйрин патав кIвалериз тухун патал медицинадин идарайриз цIийи 91 машин чара авунва. Идалайни гъейри, алай вахтунда программадин куьмекдалди Дагъустанда 60 ФАП цIийикIа туькIуьр хъийизва.
Т.Беляевади къейд авурвал, ихтилат физвай программа кьилиз акъудун медицинадин рекьяй кардик квай маса программадихъ галаз сих алакъада ава: “Земский доктор/фельдшер” программадин куьмекдалди хуьруьн чкада 107 пешекар кIвалахдалди таъминарнава.
“Духтуррин гафаралди, чи йикъара эцигзавай ФАП-ри алай аямдин вири истемишунриз жаваб гузва. Агьалийриз медицинадин рекьяй къуллугъ авун патал анра герек вири шартIар тешкилнава. Гьавиляй анриз къвезвайбурун кьадарни са шумуд сеферда артух хьанва”, — лагьана министрди.
Пресс-конференциядал электронный къайдада духтурханайра нубатра акъвазуниз, диабет, эпилепсия, онкологиядин азаррик начагъбуруз государстводин патай пулсуздаказ герек раб-дарман чара авуниз талукь месэлаярни веревирдна.
Чи мухбир
