Йисан эхирдалди Кьасумхуьрел 70 километрдилай гзаф
мензилдиз цин цIийи турба тухвана акьалтIарда
Дагъустан Республикадин Гьукуматдин Председателдин заместитель Нариман Абдулмуталибова “Хуьрерин мулкар комплекснидаказ вилик тухун” госпрограммадик акатзавай “Хуьрерин мулкарин къенин акунар” махсус проектдин сергьятра аваз СтIал Сулейманан ва Ахцегь районра эцигзавай яшайишдин имаратар ахтармишна. Идан гьакъиндай “Лезги газетдиз” РД-дин Гьукуматдин пресс-къуллугъди хабар гана.
СтIал Сулейманан районда вице-премьерди Агъа СтIал-Къазмаяр хуьре эцигзавай 400 аял гьакьдай школадал ва Кьасумхуьре тухузвай цин турбадал кьил чIугуна.
Пудратдин организация тир “Дагсвязьинвест” — 1 ООО-дин регьбер Сердер Айдаеван гафаралди, имарат 2022-йисан декабрдин сифте кьилера ишлемишиз вахкун лазим я. Дарамат ишлемишдай ихтияр гун патал РД-дин эцигунрин министерстводиз кIвалахар куьтягьнавайдан гьакъиндай чар ракъурнава.
Кьасумхуьруьн куьчейрай тухузвай цин турбадин яргъивилел 70,89 километр жеда. Ам алай йисан эхирдалди куьтягьун лазим я. Къенин юкъуз цин турба технический жигьетдай 97 процентдин гьазур хьанва. Хуьруьн къенепата турба тухвана куьтягьнава. 5000 кубический метр яд гьакьдай кьве чанни эцигнава. Мукьвал йикъара турбадиз яд ахъайда ва ам ахтармишда.
Ахцегь районда Н.Абдулмуталибова яшайишдин метлеб авай пуд имаратдал (120 аял гьакьдай школа, спортдин комплекс ва 60 аял гьакьдай аялрин бахча) кьил чIугуна.
ЦIийи школа кIелдай 5 корпусдикай, пищеблокдикай, спортдин ва актовый залрикай ибарат я. Эцигунардайбурун кIвалахрихъ галаз таниш хьайила, вице-премьерди къейдна хьи, эцигунринни монтаждин кIвалахар къе-пака куьтягьдайвал я.
“Аялри кIелдай ва тербия къачудай кабинетар тадаракламишун патал алай аямдин кIелунин ва технологийрин тадаракар чкадал хканва. Классар интерактивный комплексралди таъминарда. Абурук интерактивный доскаяр, акустический системаяр, короткофокусный проекторар ва моноблокар акатзава. РД-дин эцигунрин министерстводиз кIвалахар куьтягьнавайдан гьакъиндай чар рекье тунва. Пландин бинедаллаз школа алай йисан 1-декабрдиз ишлемишиз вахкун лазим я. Эцигунрин нормайрихъ галаз кьадайвал талукь къарар къачун патал, гежел тевгьена, школадин къенепатара мебель эцигна, тадаракар электроэнергиядик ва газдик кутуна кIанда. ГьакI школадин гьаят аваданламишунин кIвалахарни куьтягьун герек я”, — къейдна Нариман Абдулмуталибова.
Ахцегьа спортдин комплекс “ТСК “Мегаполис” ООО-ди эцигзава. Кьве мертебадин дараматда волейболдал, баскетболдал, мини-футболдал, боксдал, кьуршахар кьунал, залан атлетикадал ва спортдин маса жуьрейрал машгъул жедай мумкинвал ава. Ина 1500 тамашачидиз чкаяр жеда.
Пудратдин идарадин векилдин гафаралди, дарамат 2020-йисан 26-майдиз куьтягьун лазим тир. Амма коронавирусдин азар гегьенш хьунихъ галаз алакъалу яз комплекс вахтунда эцигиз агакьнач. Идалайни гъейри, эцигунардай са бязи материалрин къиметар багьа хьана, нетижада идарадиз 30 миллион манатдив агакьна зиянарни хьана.
Эцигунардайбуруз комплексдин гьаят аваданламишун, трибунаяр, чIехи залдин пол туькIуьрун ва герек тадаракар къачун хкIама. Вири четинвилеризни килиг тавуна, дарамат 2022-йисан эхирдалди ишлемишиз вахкудайвал я.
Хуьре эцигзавай аялрин бахчадин дарамат 2020-йисан сифте кьиляй гъиле кьунай. Ам ишлемишиз вахкайла, 30 касдиз кIвалахдай чкаяр жеда.
Малум хьайивал районда авай алай аямдин истемишунриз жаваб гузвай сифтегьан имарат саки 99 процентдин гьазур хьанва. РД-дин чилерин ва эменнидин алакъайрин рекьяй министерстводин къарардалди цIийи бахча “Ахцегь район” МР-дин муниципальный хсусиятдиз вахканва.
Налогрин инспекцияда бахча “Чубарук” тIвар алаз регистрация авунва. Банкда махсус счет ачухнава. Роспотребнадзордин векилри къалурнавай бязи синихар арадай акъудайдалай гуьгъуьниз аялрин бахча 2023-йисан январдиз ачухдайвал я.
“Хуьрерин мулкарин къенин акунар” милли проектдин сергьятра аваз 2020-2021-йисара Ахцегь ва СтIал Сулейманан районриз 1,2 миллиард манат рекье тунвай.
Хийир Эмиров
