8-ноябрдиз Махачкъалада, кIвалахдин рекьяй везифаяр кьилиз акъуддайла, телеф хьайи къанун-къайда хуьдай органрин къуллугъчийрин экуь къаматар рикIера хуьнин йикъаз талукьарнавай мярекат кьиле фена. Ана РД-дин Гьукуматдин Председатель Абдулмуслим Абдулмуслимова, республикадин МВД-дин, Силисдин комитетдин, прокуратурадин кьиле авай ксари ва Дагъустандин къанун-къайда хуьдай органрин векилри иштиракна.
Абуру 500-дав агакьна Ленинан Комсомолдин тIварунихъ галай паркуна авай Ватандин ЧIехи дяведин аскердиз хкажнавай гуьмбетдал цуьквер эцигна. Ахпа абур, гъилера телеф хьайи къуллугъчийрин шикиларни аваз, МВД-дин вилик квай Мемориалдин патав хтана. Анал са декьикьада кисна акъвазна, гуьгъуьнлай Мемориалдал цуьквер эцигна.
Мярекатдин сергьятра аваз Украинада кьиле физвай махсус операциядин иштиракчийриз бахшнавай серенжемни кьиле фена. Эхирдай Урусатдин Гимн яна, цавуз уьлкведин Пайдахдин рангарин шарар ахъайна.
«Лезги газет»
