Хци месэла
Гьуьрметлу Ильман Субгьанович! Куьн чи Мегьарамдхуьруьн райондин агьалийри Халкьдин Собранидиз хкянавай векил-депутат тирвиляй заз, квехъ элкъвена, са-кьве келима кхьиз кIанзава. ТIалабзава зи гафариз кьетIен фикир гун. Заз куьне Дагъустандин кьиле авай ксарин вилик 10 йисалай гзаф вахтунда давам жезвай и месэла хкажна ва и кардал эхир эцигдайвал авуна кIанзава.
Квез аквазва, республикадин жуьреба-жуьре пипIерай и ва я маса чкайра цIийи школа эцигна вахканва ва я анра аялрин цIийи бахчаяр кардик кутунва лугьудай ванер-сесер мукьвал-мукьвал жезва. “Сагърай ватанпересар” лугьуз, датIана хабарар агакьзава маса миллетрин районрай.
Гьа са вахтунда чи райондин гьуьрметлу агьали-меценат Шагьпазов Фридона вичин хсуси харжийралди хайи маканда гьикьван баркаллу крар авунватIа, виридаз ашкара я. Адаз райондин кьилини халкь патал авур крарай еке къимет гайи документарни ава.
Амма заз инал ада Билбилхуьруьн-Къазмайрал эцигнавай ва, сакIани кьабул тийиз, гзаф йисаралди сударани-дуванра гьатнавай ва кардин а кьил таквазвай пуд мертебадин цIийи школадин дараматдиз талукь месэладал фикир желб ийиз кIанзава. Кьилди къачуртIа, заз куьне и кар гъиле кьуна ва и месэладал кIукI гъиз туна кIанзава. Вучиз цIийи мектеб кьабулзавачтIа, низ ада манийвалзаватIа жемятдиз чизвач. Фадлай эцигна куьтягьнавай вижевай цIийи дарамат йисаралди ачух тийиз тун эсиллагь дуьз кар жезвач. Яраб себеб вуч ятIа?! Шад жедай Билбилхуьруьн муаллимарни, аяларни, эгер и месэла чкадилай юзанайтIа.
И йикъара зун а патаз акьатнавай. ЦIийи дараматдин патав куьгьне школа гва, вични — цларик, бирдан чкIайтIа лагьана, къецелай дестекар кутунвай. Югъ са тIимил мекьидини тир, а куьгьне мектеб акурла, заз гьатта хар акъатна — рикIиз акI авай хьи, гуя ана тарсара авай аялрин кIвачер рекъизва…
КIерецдин къеняй тIуьн тавуртIа, къецелай ам кукра недач. Куьн машгьур журналист я, куьне авай месэлайрал фикир желбзава. Идалайни гъейри, куьн депутатни я. И месэладин геле гьатна, багъри лезги чилел цIийи мектеб ачухдайвал тавуна тун куь рикIи гьикI кьабулда?! Чи дамах ва даях, датIана мергьяматлу крарик кьил кутазвай стха, и хци месэла, вири серенжемар кьабулна, тади гьалда гьялна кIанзавайди я. Умуд кутазва, гьакI женни ийида.
Бикеханум Алибегова, писатель, журналист
