КIелунин 2022-2023-йисалай башламишна, мектебра кIелзавай аялри нетижаяр кьадай изложение ачух тир банкдай къачунвай текстер ишлемишуналди кхьида. Идакай РД-дин образованидин ва илимдин министерстводи хабар гузва.
Изложенийрин банк нетижаяр кьадай изложенидиз гьазурвал акунин нетижалувал хкажун, гьакIни ахтармишунардай кIвалахрин михьивал ва ачухвал таъминарун патал арадал гъанва. Ина 2014-2022-йисара туькIуьрнавай 300-лай гзаф текстер ава. Абур вири къайдада тунва ва пуд паюниз пайнава.
Сад лагьай паюник — “Эдебдин девлетар” — хъсанвиликай, бахтлувиликай, муьгьуьббатдикай, дуствиликай, гьахълувиликай, мергьяматлувиликай, яратмишунрикай тир текстер кутунва. Абур руьгьдин девлетриз, инсандин эдеблувилиз ва маса ксарихъ галаз алакъайриз талукь я.
Кьвед лагьай пай — “ТIебиатдин алем” — элкъвена кьунвай тIебиатдикай, гьайванрин амалрикай, абурунни инсандин дуствиликай, экологиядин месэлайрикай ва уьмуьрдин тарсарикай ибарат я.
Пуд лагьай паюник — “Тарихдин вакъиаяр” — культурадин, илимдин ва техникадин хилерин лайихлу пешекаррин биографийрикай, гьакIни ватандин гьам ислягь, гьамни дяведин вахтунин вакъиайрикай, фронтдин ва далу патан игитвилерикай чинар кухтунва.
Министерстводи къейд авурвал, нетижаяр кьадай изложение кьиле тухудай ва кIвалахриз къимет гудай къайдайрик дегишвилер кутунвач.
«Лезги газет»
