Россияда агьалийрин кIвалерив тIебии газ пулсуздаказ агакьарунин программа 2022-йисалай гуьгъуьнизни давамарда. Ихьтин тапшуругъ гьукуматдиз уьлкведин Президент Владимир Путина “Россиядин энергетикадин гьафтедин” вахтунда гана.
РикIел хкин, программа государстводин Кьилин тапшуругъдалди кардик кутунай. Ам 2022-йисан эхирдалди кьилиз акъудун лазим тир. Программадин сергьятра аваз, агьалияр яшамиш жезвай чкайра, хуьрера кIвалин иесидин участокдин сергьятдал кьван мензилдиз газдин линияр агакьарунин кIвалахар тамамдаказ государстводин гьисабдай кьилиз акъудзава. Агьалидин гьакъидихъ анжах адан хсусиятда авай участокдин къенепатан кIвалахар ийизва.
Владимир Путинан гафаралди, газдин тадаракрин ва тамамарзавай кIвалахрин къимет гзаф аялар, ветеранар, инвалидар, агъуз тир дуллух авай хизанар патал алава парциз элкъвезва. Ада регионрин властриз ихьтин къатарик акатзавай агьалийриз газдин тадаракар маса къачун ва абур эцигунин (участокдин къенепата) кIвалахар тамамарун патал 100 агъзур манатдилай тIимил тушиз субсидияр чара авун тапшурмишна.
Бюджет усалди тир регионра и рекьиз федеральный такьатар ишлемишда. ГьакIни пулсуздаказ газламишунин программадик, мектебрилай гъейри, медицинадин идараярни кутада. В.Путина Газпромдал, тамамдаказ газламишунин программадин сергьятра аваз, алай йисан 1-декабрдалди медицинадин идараяр ва тадаракар газдин сетрик пулсуздаказ кутун патал къарарар кьабулун тапшурмишна.
“ИкI, мулкар патал кар алай жемиятдин яшайишдин объектрив — медицинадин ва образованидин — ужуз ва экологиядин жигьетдай михьи энергия агакьда. Им лагьайтIа, хуьрерин чкаяр патал иллаки важиблу делил я”, — къейдна Россиядин Президентди.
Пулсуздаказ газламишунин программадин сергьятра аваз Дагъустанда кьиле тухванвай кIвалахрикай лагьайтIа, региондин программадин план-графикдик республикадин 304 хуьре авай 2492 кIвал кутунва. Идакай и йикъара кьиле фейи пресс-конференциядал РД-дин энергетикадин ва тарифрин рекьяй министр Ризван Мурадова хабар гана. Адан гафаралди, къенин йикъан делилралди, программада иштиракун патал гузвай арзайрин кьадар республикада гзаф хьанва. “Гьа са вахтунда арзайрин хейлин кьадар элкъуьруниз мажбур жезва, вучиз лагьайтIа, бязибуруз чеб кIвалин-чилин иесияр тирди тестикьарзавай документар авач. ИкI, и себебдалди агакьарнавай 3750 арзадикай 619 кьабулиз хьанвач”, — лагьана министрди.
Санлай къачурла, министрдин гафаралди, республикадин 75,8% мулкар тамамдаказ газламишнава ва, санлай къачурла, им хъсан делил я. Эхиримжи делилралди, газ агакь тавунвайбурун арада Дагъустанда 11 район ва Бежтадин участок ама.
“Региондин и районар тади гьалда газламишунин месэла вилик эцигнава. И рекье кIвалахарни активнидаказ тухузва. Малум тирвал, ибур дагълух, четин рекьер авай мулкар я. Гьаниз килигна, сифтедай тамамдаказ фагьум-фикир авуна, ихьтин чкаяр патал вуч хийирлу ятIа чирна кIанзава: газламишун хъсан яни, тахьайтIа, электроэнергиядалди таъминарун.
Чи мухбир
