Октябрдин эхирра Каспийскда азаддаказ кьуршахар кьунай машгьур спортсмен Али Алиеван 52-сеферда кьиле фейи турнирда Россиядин регионрай, гьа гьисабдай яз чи республикадай тир 200-далай виниз спортсменри заланвилин 10 категориядай гьасиррал чпин устадвал къалурна. Санлай дагъустанвийри 24 медаль къазанмишна. Тарифдай нетижаяр чи ватанэгьлийрихъни хьана…

Кьилди къачуртIа, Рамазан  Ферзалиева 65 кг-дал къведалди заланвал авайбурун арада кьиле тухвай вири бягьсер 45:1 гьисабдалди (анжах финалда адахъ галаз бягьсиниз экъечIай Гьажимурад Омаровалай чи ватанэгьлидивай са балл къакъудиз хьана), абурукай пудни — вахт амаз акьалтIаруналди, къизилдин медаль къазанмишна.

1-чкадиз лайихлу хьайи Даурен Куругълиеваз (97 кг-дал къведалди заланвал авайбурун арада) дагъустанви Тажудин Мухтаров — 11:0, ярумчух финалда Адыгеядай тир Хаби Хашпаков 2:0 гьисабдалди кумукьна. Вири бягьсер инанмишвилелди кьиле тухвай Д.Куругълиевахъ галаз финалда Гьабиб Гьажиев тIарвал себеб яз гьасиррал экъечIнач.

И турнирда Бегхан  Мисриханов  79 кг-дал къведалди заланвал авайбурун арада 2-чкадиз лайихлу хьана (Аманула Гьажимегьамедоваз ам анжах са баллдин тафават аваз кумукьна).

«Лезги газет»