Гуьгьуьллубурун кьадар

РФ-дин Яракьлу Къуватрин Генштабди малумарнавайвал, военный махсус серенжем кьиле тухуз эге­чIай­­далай инихъ 15 агъзурдалай гзаф ксар гуьгьуьллубурун дестейрик экечIна.

“ТАСС” чешмеди хабар гузвайвал, ихьтин делилар Генштабдин векил А.Туляганова Федерациядин Советдин са комитетдин заседанидал 1-ноябрдиз раижна.

Чи  уьлкведа 21-сентябрдилай тамам тушир мобилизация ма­лу­марнай ва ватандашриз эвер гунин серенжемар 28-октябрдиз акьалтIарнай. РФ-дин оборонадин министр С.Шойгуди малумарай­вал, тамам тушир мобилизациядин сергьятра аваз Россиядин кьушунриз 300 агъзур касдиз эвер гана. Тамам тушир моби­лиза­циядин­ сергьятра аваз гуьгьуьллудаказ кьушунриз фейибурун­ кьа­дар лагьайтIа, министрдин гафаралди, 13 агъзур касдикай ибарат я.

“Туьтуьнихъ кьван тух хьанва”

Чехиядин агьалияр, Украинадин къалмакъалдин нетижаяр себеб яз, “туьтуьнихъ кьван тух хьанва”. “Новости” РИА-ди раиж­навайвал, ихьтин фикир “Seznam Zpravy” изданида журналист Яна Станскидин макъалада лагьанва.

Автордин гафаралди, Украинадин гьаларихъ галаз алакъалу яз “чаз анаг итижлу туш, чпин месэла чпи гьялрай” лугьудайбур югъ-къандавай артух жезва. Мисал яз, Чехиядин агьалийри, Украина себеб яз, чпин уьлкведа электроэнергия багьа хьунилай наразивалзава. Къейдзавайвал, инсанри чеб галатнава лугьузва. Агьалийри чкадин сиясатчияр, гьукумдарар Украинадин месэлайрик артух къаришмиш тахьуник умуд кутазва.

Къейд ийин, Россия алай йисан 24-февралдилай Донбасс миллетбазрикай азадунин ва чи уьлкведин хатасузвал заминламишунин макьсаддалди Украинада военный махсус серенжем тухунив эгечIайдалай кьулухъ РагъакIидай патан уьлквейра энергоресурсрин къиметар вини кIарариз акъатна.

Гзафарун тIалабнава

Швецияда авай украинви активистрин дестейри, къалмакъал­ себеб яз, Украинадай катуниз мажбур хьанвай ксариз гузвай пулунин кьадар гзафарун тIалабнава. Идакай “Новости” РИА-ди хабар гузва.

Украинви активистрин фикирдалди, гьар юкъуз 71 кронадин (400 манат) кьадардин пособие украинвийриз бес жезвач. Гьавиляй­ активистри Швециядин гьукумдарри и такьатрин кьадар артух хъу­вун герек яз гьисабзава. Къейдзавайвал, Швецияда пулсуздаказ тIуьн гузвай украинвийриз гьар суткада 19 крона (107 манат) гузва.

Идалай вилик британвийри, уьлкведа къиметар хкаж хьуникди Украинадай катнавайбур хуьз жедай мумкинвал авач лугьуз шикаятзавай.

ООН-дин делилралди, 24-февралдилай 5-июлдалди Украинадай 8,8 миллион кьван ксар экъечIнава.

Техилдин икьрар

Чна Россияди техилдин икьрарда иштиракунал эхир эцигнава лугьузвач, ихтилат и кар гьелелиг акъвазаруникай физва. Ихьтин фикир РФ-дин Президент В.Путина 31-октябрдиз Сочида малумарна, хабар гузва “Новости” РИА-ди.

Госдумадин Председатель В.Володина вичин телеграм-каналда къейд авурвал, хатасузвилин дегьлиз террориствилин гьерекатар патал ишлемишзамай кьван техилдин икьрар гуьнгуьна хтун намумкин кар я.

“Африкадинни Азиядин гзафни-гзаф игьтияж авай уьлквейрив агакьна кIани техил тухудай мумкинвал Россияди Украинадин терефдиз гана. Амма а уьлквейрал гьалтайди анжах 3-4 про­цент я. ЧIехи пай лагьайтIа, — Евросоюздин девлетлу уьлквей­рал. И сеферда Зеленскийди, Киевдин режимдин террориствилин тIул къалуруналди, вичин гьерекатралди Туьркиядинни ООН-дин иштираквал аваз къуватда тур вири икьраррилай цIар чIугуна. ЧIулав гьуьлуьн флотдин гимийриз акси яз террорист­вилин актар кьилиз акъудун патал хатасузвилин дегьлиз иш­леми­шуниз рехъ гудач. Техилдин икьрар виликан шартIарал­ди давам хъжедач”, — кхьенва В.Володина.

Акъвазаруниз эвер гана

Дагълух Къарабахдин сергьятра Эрменистандинни Азербайжандин арада авай къалмакъал куьтягьна кIанда. “Интерфакс” чешмеди хабар гузвайвал, ихьтин фикир Россиядин Президент В.Путина 31-октябрдиз Эрменистандин премьер-министр Н.Пашинянахъ галаз хьайи гуьруьшдал лагьана.

“ЦIуд йисар я и къалмакъал давам жез, гьавиляй ам са мус ятIа акьалтIарун герек я”, — лагьана Президентди. Ада гьакIни Азербайжандин президент И.Алиевахъ галаз санал ислягьвал арадал хкунин кар алай макъамриз фикир гун теклифна.

Идалай вилик Н.Пашиняна къалмакъал авай зонада ис­лягьвал­ хуьдай Россиядин аскерар амукьунин муддат артухар хъийиз­  Ереван гьазур тирдакай лагьанай.

«Лезги газет»