РД-дин Гьукуматдин Председателдин заместитель Нариман Абдулмуталибован регьбервилик кваз ислендиз кьиле фейи совещанидал Дербент, Хасавюрт, Къарабудахкент ва Къумторкъала районра зирзибилар гьялдай объектар эцигунин месэла веревирдна. Малум хьайивал, кIеви амукьаяр гьялдай комплексар эцигунин кIвалахрив алай йисуз эгечIда. КIвалахар тамамарун патал “Республикадин экологиядин оператор” ООО-дихъ галаз икьрар кутIуннава.
Н.Абдулмуталибова къейд авурвал, кьуд муниципалитетда пуд полигон ва зирзибил гьялдай пуд комплекс эцигун кьетIнава. “Им еке ва Дагъустан патал важиблу проект я”, — лагьана ада.
Совещанидин нетижаяр кьадайла, вице-премьерди РД-дин тIебиатдин ресурсрин ва экологиядин министерстводал “рекьин карта” бегьемар хъувун ва разивал гун патал чпин мулкарал объектар эцигдай муниципальный тешкилатрив ва маса идарайрив агакьарун тапшурмишна.
Алай аямдин истемишунрив кьазвай зирзибилриз талукь объектар 2024-йисуз эцигна акьалтIарун фикирдиз къачунва.
«Лезги газет»
