… Эгер ваз са йисан хъсанвал ийиз кIанзаватIа, гергер цуз, цIувад йисан — са емишдин тар акIура, эгер вири уьмуьрдин хъсанвал ийиз кIанзаватIа, инсан тербияламиша, лугьузва халкьдин мисалда. Дерин чирвилер авай, кар алакьдай, жемятдиз хийир гудай инсанар тербияламишунин карда муаллимрин зегьмет екеди я. Гьакъикъатдани, муаллимди чирвилер гайила я инсандикай алимни, гьакимни, хъсан пешекарни жезвайди.
Муаллимрикай рахадайла, РФ-дин Президент Владимир Путина лагьай гафарни гъун лазим аквазва заз: “Образованидин мягькем къурулуш кар алакьдай, бажарагълу муаллимрин къуватралди арадал къвезва. Ахьтин пешекарар са-сад хкягъиз, хвена кIанда”.
Вири уьмуьрда хъсанвал ийизвай, хкяна, хвена кIандай са муаллимдикай газетдиз макъала кхьинин фикир аваз зун СтIал Сулейманан райондин администрациядин образованидин управленидин начальник Гьуьсейн Шихбабаеван патав фена. Дуьз лагьайтIа, са муаллимдин тIвар кьун адаз четин акъвазна. Хъсан муаллимар районда гзаф ава.
Акьалтзавай несилдиз чирвилер ва тербия гунин карда агалкьунар авай муаллимрикай яз Гь.Шихбабаева чаз ЦIийи поселокдин юкьван школада физикадин тарсар гузвай муаллим Мейланов Сабир Пирметовичан (шикилда) тIвар кьуна.
— Сабир Пирметовичакай рахадайла “Инсан”, “Муаллим” ва “Тербиячи” гафар чIехи гьарфунилай кхьиниз лайихлу я, — лагьана РУО-дин начальник Гьуьсейн Шихбабаева. — Ам неинки районда, гьакIни Кьиблепатан Дагъустанда физикадин лап хъсан муаллимрикай сад я. Адаз чи, школьникрин ва абурун диде-бубайрин патайни еке гьуьрмет ава. Сабир муаллим чи дамахни, даяхни я.
Районда ва адалай къецени машгьур Мейлановрин баркаллу тухумдин тIвар кьурла, зи рикIел КПСС-дин Мегьарамдхуьруьн, Ахцегь ва Кьасумхуьруьн райкомрин сад лагьай секретарвиле, 17 йисуз Кьасумхуьруьн райисполкомдин председателвиле кIвалахай Пирмет Мейланован, 40 йисалай виниз СССР-дин КГБ-дин органра кIвалахай Мейлан Мейланован, КПСС-дин Сулейман-Стальский райкомдин 1-секретарвиле, КПСС-дин Дагъустандин обкомда ва Министррин Советда кIвалахай Алимет Мейланован, физикадинни математикадин илимрин доктор, РАН-дин ДНЦ-дин геотермиядин институтдин директордин заместителвиле кIвалахай Руслан Мейланован ва масабурун тIварар къвезва.
Аквазвайвал, Сабир муаллимди баркаллу и тухумдин кар лайихлудаказ давамарзава. Дагъдин гурлу вацIуз акъвазун хас туш, ада гьамиша виликди еримишда!
Сабир Мейланов 1954-йисуз Пирмет Алиметович ва Хадижат Гьезеровна Мейлановрин хизанда дидедиз хьана. Ада 1972-йисуз Кьасумхуьруьн 1-нумрадин юкьван школа лап хъсан къиметар аваз акьалтIарна, гъвечIи чIавалай рикIе авай мурад кьилиз акъудун патал ам В.Ленинан тIварунихъ галай Дагъустандин госуниверситетдин физикадин факультетдик экечIна.
1974-1976-йисара Сабир Мейланова армиядин жергейра къуллугъна, ДГУ-да кIелун давамарна. Инани ам чешнелу студентрин жергеда хьана.
ДГУ лап хъсан чирвилер аваз акьалтIарай жегьил пешекарди вичин зегьметдин рехъ 1980-йисуз Герейханован хуьруьн юкьван школада физикадин муаллимвиле кIвалахунилай башламишна.
Тамам кьуд йисуз муаллим яз аялриз физикадин сирер чирай ада гуьгъуьнлай Кьасумхуьруьн администрацияда кардик квай яш тамам тахьанвайбурун крарай комиссиядин жавабдар секретарвиле, инспекторвиле кIвалахна. Дерин чирвилер, зигьин авай, тешкилатчивилин кIвалах алакьдай пешекарди и везифаярни намуслудаказ кьилиз акъудна. Адан кIвалахдилай райондин гьакимарни рази тир. Гьавиляй С.Мейлановаз райадминистрацияда кесерлу маса къуллугъарни теклифнай. Амма, вичи лагьайвал, “муаллимвилин пеше ивидик квай” Сабир Пирметовича акьалтзавай несилдиз чирвилер гунин жавабдар кIвалах давамар хъувун кьетIна. РикIин эмирдиз килигна Сабир Пирметовича 1996-йисалай къенин йикъалди районда гьар са рекьяй хъсанбурун жергеда авай ЦIийи поселокдин юкьван школада физикадин муаллим яз кIвалахзава. Ада 4 йисуз кIелунин рекьяй школадин директордин заместителвиле кIвалахайдини къейд авун лазим я.
— Заз дамахдивди къейд ийиз кIанзава хьи, чи школада пешедал ва аялрал рикI алай, хъсан чирвилер ва кIвалахдин гзаф йисарин тежриба авай муаллимри кIвалахзава, — лугьузва школадин директор Бег Абдулашимович Ягъибегова. — Абурукай сад школадин дамах тир физикадин муаллим Сабир Пирметович я. Гьа ихьтин пешедин устадар тир муаллимрин зегьмет себеб яз чи школадай 27 йисан яшда аваз физикадинни математикадин илимрин докторвилин диссертация хвейи Заур Алисултанов хьтин ва маса алимар, хъсан пешекарарни акъатна. Идай за чи муаллимриз, гьабурун жергедай яз Сабир Пирметовичазни, сагърай лугьузва.
С. Мейланова чирвилер гузвай аялри гьар йисуз районда ва республикада тухузвай школьникрин олимпиадайра кIвенкIвечи чкаяр кьазва.
Чешнелу муаллим, хъсан общественник хьиз, Сабир Пирметович гьуьрметлу хизандин кьилни я. Ада уьмуьрдин юлдаш Гуьлмира Надировнадихъ галаз пуд велед тербияламишна, уьмуьрдин шегьредал акъудна. Замира, Назира ва Динаради политехнический институтар акьалтIарна, чпин пешейрай кIвалахзава.
РикI алай пешеди, ферли веледри ва, цуьквер хьтин 7 хтулдини С.Мейлановаз рикIин шадвал, руьгьдин таъминвал, пакадин йикъахъ инанмишвал гузва.
Яргъал йисарин намуслу зегьметдай алай йисан 26-августдиз Кьасумхуьрел кьиле фейи райондин образованидин работникрин совещанидал СтIал Сулейманан райондин кьил Саид Темирханова ЦIийи поселокдин юкьван школадин физикадин муаллим Сабир Мейлановав райондин кьилин тIвар кхьенвай гъилин сят вахкана.
“Муаллим, вич куз, масадаз ишигъ гузвай шем я” лагьанай XIX асирда яшамиш хьайи Италиядин писатель Джованни Руффиниди.
Ви шемини масадбуруз гузвай ишигъ мадни экуьди хьурай, гьуьрметлу Сабир Пирметович!
Хазран Кьасумов
