ЦIийи ктабар

Гъилевай йисуз Сардархуьряй тир муаллим ва шаир Абдурагьман Межидован 90 йис тамам хьана. 1932-йисуз дидедиз хьайи ва 2012-йисуз регьметдиз фейи ада вичин савадлу вири уьмуьр муаллимвилин пешедиз ва шииратдиз бахшна.

Мукьвара кIелзавайбурал рагьметлу Абдурагьман Межи­до­вахъ галаз алакъалу кьве сав­­­кьат: А.Межидован “Адалат” (шиирар ва поэма) ва писатель, алим Гьаким Къурбанан “Сардархуьр — дустарин мескен” (делилрин повесть) ктабар агакьна.

Абдурагьман Межидован “Адалат” ктаб автордикай Гьаким Къурбана ва Мердали Жали­лова­ кхьенвай “Адалатлу зари” ва “Су­лейманан багъдин билбил…” ма­къалайрилай башламиш жезва. ЦIийи ктабда автор­ди жуьреба-жуьре йисара яша­йишдикай, муьгьуьббатдикай ва багъри инсанрикай кхьенвай 50-далай виниз шиирар, 7 кьиликай ибарат тир “Берекатдин сир” поэма гьатнава.

Мана-метлебдиз ва жанрайрин кьетIенвилериз килигна, “Адалат” ктабда гьатнавай эсерар “Яшайишдин чIалар”, “Муьгьуьббатдин чIалар”, “Кьуд цIа­рар”, “Бахшбендер”, “ЧIехи эсерар” кьилериз пайнава.

“ЦIийи Кавказ” издательстводи 88 чиникай ибарат яз офсетдин чарчел акъуднавай ктабдиз редакторвал Дагъустандин халкьдин шаир Майрудин Бабаханова авунва.

* * *

Машгьур алим ва писатель Гьаким  Къурбанан  “Сардархуьр — дустарин мескен”  ктаб, чна винидихъ лагьайвал, шаир ва муаллим Абдурагьман Межидован 90 йис тамам хьуниз талукьарнава. Делилрин повесть 25 кьи­ли­кай ибарат я. Повестда ХХ асирдин 2-паюнин Куьредин хуьрерин яшайиш, адетар, агьвалатар ва жегьилрин дуствилин алакъаяр къалурнава. Гьерекатар Векьелрал, Кьасумхуьрел, Сардархуьре, Цмурдал ва маса чкайра кьиле физва. Игитар гьа­къикъатда хьайи, тарихда чпин гелер тунвай баркаллу инсанар я. Повестда автордин ме­целай суьгьбетзава, ам гьа девирдин шикилри чIагурнава.

Ктабда Гь.Къурбанан, А.Межидован, А.Магьмудован, ве­кье­ларви Сейфудинан, сардархуьруьнви Саидагьмедан дуствилин алакъаяр къалурзавай хейлин шикиларни ганва.

Делилрин повесть Гьаким Къурбана ихьтин келимайралди акьал­тIарзава: “… За 60 йисуз кхьей чандафтаррай, “Акур-такур, хьайи-тахьай” ктабдай лезги ше­гьеррин, хуьрерин, тухумрин, рух­вайрин, рушарин жанлу шикилар, къаматар аквазва. Абур чан алайбур хьиз акъвазнава, гьар сад вичикай махсус эсер кхьиниз лайихлу я.

Сардархуьруьн кимел бубаяр ацукьай пак къванер лайихлу рухвайри хуьзва…”.

Ктабдин редакторвал пи­сатель ва алим Сардар Абила авуна.

Хазран Кьасумов