Газетда кIвалахиз башламишдалди са тIимил вахт вилик за типографияда кIвалахнай. Газетдин кьилин редакторвиле, райондин руководстводин тIалабуналди, муаллим Абдулла Семедович Семедов хкянавай. 2004-йисуз адан яхцIурни цIуд йис тамам хьанвай.
Эхиримжи къанни цIуд йисалай виниз девирда Абдулла муаллимди вичин асул везифаяр Кьурагьрин 1-нумрадин юкьван школадани давамарзава.
Завай, белки, жувахъ галаз са шумуд йисуз гьакьван устадвилелди кар бажармишай ( а чIавуз чи газет вири лезги районрин газетриз чешне яз къалурзавай) и муаллимдин журналиствилин рекьиз лап вини дережадин къимет гуз жедайтIани, муаллимвилин рекьяй адан ахлакьдизни, чирвилеризни, чалишмишвилериз лазим тир къимет гуз жедач. Амма заз ван хьайи дуьшуьшдикай лугьуз кIанзава: 9-классда Абдулла муаллимдин тарсуна 11 муаллим ацукьнавай. Тарс акьван устадвилелди кьиле феналдай хьи, ам куьтягь хьайила Рагьимханова Марият муаллимди икI лагьана: “И школада кIвалахай къанни цIувад йисалай виниз девирда заз аялри икI жавабар гайи тарс акурди туш”.
Школада, райондин жуьреба-жуьре идарайра лезги чIалай тухузвай мярекатриз Абдулла муаллимдиз теклиф авун ва адаз анрал гаф гун дуьшуьшдин кар туш.
Завай муаллимдин ахлакьдикай яргъалди рахаз жеда. Жувахъ галаз санал са шумуд йисуз кIвалахай, са магьледа яшамиш жезвай завай и муаллимдикай анжах хуш келимаяр лугьуз жеда.
1995-йисуз Дербентдин педколледж акьалтIарай Абдулла муаллимдин чIехи хва Асланбегани эвелдай са шумуд йисуз Штулрин тамам тушир юкьван ва ахпа Кьурагьрин 1-нумрадин юкьван школайра муаллимвиле кIвалахна. Гуьгъуьнлай адаз багъри газетда жавабдар секретарь яз кIвалахун теклифнай. Муаллим яз, адаз газетда кIвалахун са акьван четин хьанач. Гуьгъуьнлай Асланбегаз райондин сайтдин оператор яз кIвалахун теклифна. И везифа ада алай вахтундани лазим дережада аваз кьиле тухузва.
Абдулла муаллимдин гъвечIи руш Гьамиятани вичиз муаллимвилин пеше хкягъун дуьшуьшдин кар туш жеди. Саки къад йис идалай вилик ада Дербентдин педколледж, лезги чIалан муаллимвилин пеше къачуналди, лап хъсан къиметар аваз куьтягьнай. Адалай инихъ Гьамият муаллимди эвелдай КIутIулрин тамам тушир юкьван ва гуьгъуьнлай Кьурагьрин 1-нумрадин юкьван школада хайи чIалан муаллим яз кIвалахзава. Кьилин категориядин муаллим яз, ада хайи школада аялрихъ галаз тухузвай мярекатрин метлеблувал вини дережадинди я. И мярекатра аялрини активнидаказ иштиракзава.
Анжах эхиримжи кьве йисан девирда Гьамият муаллимдин гъилик чирвилер къачузвай аялри районда ва республикада кьиле тухузвай конкурсра кIвенкIвечи чкаяр кьунва. Мисал яз, абурун жергеда Лаура ва Элина Эмирбеговаяр, Афрадита Рагьимханова, Фатима Семедова, Сефият Абдуллаева, гьакI хейлин маса аяларни ава. И аялар махсус дипломризни пулдин пишкешриз лайихлу хьанва. Ихьтин дипломар Гьамият муаллимдиз вичизни ганва.
Гьамият муаллимди хайи школада мукьвал-мукьвал СтIал Сулейманан, Етим Эминан, Алирза Саидован уьмуьрдин ва яратмишунрин рекьиз талукь яз тухвай ачух тарсара иштиракай муаллимрин ва аялрин бейнида дерин гел туна. Тарсар гьакьван тешкиллувилелди ва чирвилер гунин рекьяй лап вини дережада аваз кьиле фенай.
Муаллимвилин пешедал рикI алай хизандиз Аллагьди муаллим свасни багъишна. 2012-йисуз Дербентдин педколледж куьтягьай Аидади эвелдай Кьурагьрин “Гияр” ясли-бахчада аялрин тербиячи яз кIвалахна, алатай йисан сентябрдилай инихъ Кьурагьрин 2-нумрадин юкьван школада сифтегьан классрин муаллим яз зегьмет чIугвазва. Жегьил муаллим Аидадихъ гележегда генани хъсан агалкьунар жедайдал са шакни алач.
Абдулла муллимдин гъвечIи хци, Фаика, Дербентдин “Юждаг” институтдин физкультурадин факультетда кIелна. Алай вахтунда ада тамам тушир мобилизациядин сергьятра аваз вердишвилер къачузва.
5-октябрдиз муаллимри пешекарвилин сувар къейдна. Чна Абдулла муаллимдин хизандиз, гьакIни абурухъ галаз санал къуьн-къуьневаз зегьмет чIугвазвай вири муаллимриз и югъ мубаракзава.
Ирада Юсупова
