И мукьвара чал агакьнавай “Лезги газетдин” 37-нумрадай за Сражидинов Агьмедхана кхьенвай “Кьисас” макъала дикъетдивди кIелна. Асул гьисабдай автордин фикирда авайди, фадлай секинвал тагузвай “кьисас” вуч затI, гьерекат, хесет… газет кIелзавайбуру гьикI аннамишзаватIа тайинарун я. Им, гьелбетда, пис кар туш, чин тийизвай затI, чи бубайрин мисалда лагьанвайвал, “къванцивайни хабар кьуна чирун герек я”. А.Сражидинова и месэладиз талукь са шумуд мисални, делилни гъанва. И месэладин гьакъиндай заз жуван фикирарни лугьуз кIанзава.
Кьисас инсанрин, пачагьлугърин, гьукуматрин арада, яшайишда лап къадим девиррилай авайди ашкара я. Гьелбетда, кьисасдин дибда, сифте нубатда, хъилен ва я пехилвилин себебар ава.
Мисалар гъин. Са мус ятIани багъдиз, салаз гирведилай малар, лапагар фена, тIуьна цанвай затIар. ТIуш гана, тергна. Зарар хьайи иесиди жедай крар я лугьузватIани, рикIин къеняй ада кьисас вахчудай кутугай вахт вилив хуьзва.
Яна, кьурурна, пака кIемера кьун фикирда авай кьурай векьериз йифиз сада къубудай яд ахъайна. Абур вири кьежена, чIугур зегьметар бада фена, хъел атуникди, кьисас вахчудай гьалар арадал къвезва.
Чаз яшлубурувай ван хьайивал, виликдай кьисасдин нетижаяр яз чуьнуьхунар авур итимар яна кьейи дуьшуьшар гзаф хьайиди я. Кьисасчи гьамиша юкьвалай гапур куьрсна, юкьвак тапанчи кваз къекъведай. Ада акатай чкадал — рекье, базарда… вичин чиркин кар кьилиз акъуддай. Имни тухумрин арада аваз хьайи туькьуьлвилериз рехъ гунин, бегьем тербия тахьунин, адетрал амал авунин нетижа тир.
Са гафуналди, кьисасди акьалтIай чIуру крариз рехъ гузва. Эгер хъсан меслятчи арада гьат тавуртIа, кьве падни гьайиф чIугвадай эхирдал къведа. Виликдай камаллу ксари кьисасчияр меслятдал гъун патал лапагар, гьерер тукIуна, са суфрадихъ ацукьарна, анал веревирдер авуна, кьисасчийрив меслят хъхьун тестикьарун яз гъилер ягъиз тадай. Лагьана кIанда, ихьтин тежрибадикай чи йикъарани менфят къачузва.
Кьисасдик садрани кьил кутамир! Ша, чна акьалтзавай несилдиз къени крарин чешне къалурин. Жувалай алакьдай хъсанвал ийиз алахъ, гьатта писвал авурдазни. Бубайрихъ “хъсанвал гьуьлени батмиш жедач” лугьудай мисал авайди рикIелай алудмир!
Райсудин Набиев
