Ислендиз  Сергей Меликова Урусатдин Кьиблепатан ва Кеферпатан Кавказдин федеральный округра Узбекистандин Генеральный консул Бурхан Аликуловахъ галаз гуьруьш кьиле тухвана. “Лезги газетдиз” РД-дин Кьилин пресс-къуллугъди хабар гайивал, абуру алишверишдин, экономикадин, медениятдин, туризмдин, образованидин ва яшайишдин маса хилерай амадагвилин алакъаяр мягькемарунин месэлаяр веревирдна.

Кьилди къачуртIа, Узбекистандин делегацияди Дагъустанда бизнес-форум, туризмдиз талукь фестиваль кьиле тухун, алишверишдин кIвалер арадал гъун, вузрин арада алакъаяр тешкилун, Узбекистандин авиалинийрин рейсер кардик кутун теклифна.

Сергей Меликова мугьманар тебрикуналди, Урусатдинни Узбекистандин арада авай дуствилин алакъаяр къейдна ва регионар вилик тухунин рекье санал кIвалахуниз эвер гана.

Гуьруьшдин сергьятра С.Меликовани Б.Аликулова теклифнавай проектар веревирдна, бязибурун гьакъиндай меслятарни авуна. Мисал яз, мукьвал­­­ тир девирда Узбекистанда Дагъустандин вузрин векилханаяр ачухдайвал я.

«Лезги газет»