Алай йисан 9 вацран муддатда Дагъустанда рекьерал 1047 авария хьана, нетижада 217 кас, гьа жергедай яз, 21 аялни телеф хьана. Идакай республикадин МВД-дин пресс-къуллугъди хабар гузва.
Улакьар сад-сада акьур 514 дуьшуьшдин нетижада 106 кас кьена ва 869-дал хирер хьана. Улакьри инсанар ягъай 242 агьвалатдин нетижада 43 кас кьена, 207-дал хирер хьана. Хаталу чкайра улакьар дагьарриз аватунин 63 дуьшуьшдин нетижада 17 кас кьена ва 82-дал хирер хьана. Автобусар гьалзавай водителрин тахсир себеб яз 16 ДТП арадал атана ва 9 кас телеф хьана, 31-дал — хирер.
РД-дин МВД-дин Госавтоинспекциядин къуллугъчийри улакьар гьалзавайбуруз ва яхдиз къекъвезвайбуруз рекьерин гьерекатрин къайдайрал амал авуниз эвер гузва.
Малум тирвал, хасаратрин агьвалатар арадал атунин асул себебар улакьар гьалзавайбуру рекьера гьерекат авунин къайдаяр чIурунихъ галаз алакъалу я.
“Рекьерин лишанриз фикир тагузвай ва улакьдин йигинвал кьадарсуз артухарзавай водителди масадбур патал арадал гъизвай хаталувал аннамишун лазим я. Автомобиль еке хаталувал гъун мумкин тир чешме я, гьавиляй ам гьалунив кIевелай дикъетлувилелди ва жавабдарвилелди эгечIна кIанда”, — лагьанва МВД-дин пресс-къуллугъдин малуматда.
«Лезги газет»
