“Россети Северный Кавказ” — “Дагэнерго” филиалдинни Дагъустандин МФЦ-дин арада кутIуннавай икьрардал асаслу яз, госкъуллугърин центрайра кьилдин ксар патал электричестводин лицевой счётар ахъаюнин­ ва юридический идараяр патал энергиядалди таъминарунин икьрарар кутIунунин арзаяр кьабулзава.

Сетрик кутун ва электроэнергиядикай къанунлудаказ менфят къачун патал лицевой счётдин нумра къачун чарасуз я, ишлемишзавай ресурсдин гьакъи гьадан бинедаллаз гузва. Лицевой счёт яшайишдин вири чкайриз пулсуздаказ ахъайиз жезва.

Капиталдин гьисабдай

Дидевилин капитал авай хизанривай адан такьатрин гьисабдай кредитдин гьакъи вахкуз жеда. И кар патал бязи шартIарал амална кIанзава. Кьилди къачур­тIа, кредитдин икьрарда “кIвал маса къачун патал” кхьенваз хьун чарасуз я. Кредит кIантIа дидедин, кIан­тIа бубадин кIвачихъ къачунвайди хьурай, амма эвленмиш хьунин гьакъиндай официальный документ хьун шартI я.

Къейд ийин, 2022-йисуз сад лагьай аялдиз талукь дидевилин капиталдин пулунин кьадар 524,5 агъзур манатдикай ибарат я. Кьвед лагьай аялдиз талукьди — 693,1 агъзур манатдикай. Чир хьун важиблу я хьи, и кьве кьадар (сумма) санал жем ийизвач. Эгер хи­зан­ди­ сад лагьай аялдин сертификат ишлемиш­на­ватIа, кьвед лагьай аялдай абуруз алава 168,6 агъзур манат хгуда.­

Гегьенш малуматар МЦФ-дин идарайрин пешекарривай чириз жеда.

Гзаф аялар авай хизанриз

Ипотекадин бурж вахкун патал государстводин па­тай 450 агъзур манатдин пулунин такьатар къачуз жедай программа фадлай къуватда ава. Ам гзаф аялар авай хизанриз талукь я. Государстводин патай куьмек гузвай программа кардик хьунин муддат мад са йисан артух хъувунва.

Гила адакай 2024-йисан 1-июлдалди кредитдин икь­рар кутIуннавай ва чпихъ 2019-йисан 1-январдилай­ 2023-йисан 31-декабрдалди пуд лагьай (ва я мадни гзаф) аял хьанвай диде-бубайривай менфят къачуз жеда.

Къейд ийин, и куьмек къачун патал банкуниз фин герек я.

Суал-жаваб

Итимни паб чара хьайила, дидевилин капиталдин такьатар пайзавани? И суалдин жавабни МФЦ-ди раиж­нава: ваъ, дидевилин капитал умуми эменнидик акат­завач ва итимни паб чара хьайидалай кьулухъ ам пайзавач.

Месела, эгер дишегьлидихъ дидевилин капиталдин сертификат аватIа, чара жедай вахтунда итимдивай такьатрин пай истемишиз жедач. Государстводи ганвай куьмекдин пул харжунин месэла дидеди вичи гьялда.

Эгер, дидевилин капиталдин такьатар ишлемишна, кIвал маса къачунваз хьайитIа, итимдиз кIвалик вичин пайни ква лугьудай ихтияр ава.

«Лезги газет»