1-октябрдиз Алкьвадар Гьасанан тIва­рунихъ галай медениятдинни марифатдин центрадин активди лезги интеллигенциядин векилрихъ галаз гуьруьш кьиле тухвана.

Мярекатда центрадин директор, «Лезги газетдин» кьилин редактор Мегьамед Ибрагьимова, РД-дин Халкьдин Собранидин депутат Самир Абдулхаликьова, РД-дин Общественный палатадин член Ислам Мегьамедова, ДГПУ-дин профессор Шайдабег Мирзоева, СтIал Сулейманан райондин кьилин заместитель Эльдар Рустамова, Ставрополдин крайдин муфтийдин меслятчи Шагьпаз Асаханова, сиясатдин илимрин кандидат Агьмед Къагьриманова, центрадин директордин заместитель Мурад Яралиева, Махачкъаладин жирзаводдин директор Мегьамед Мегьамедова, аш-Шафиидин тIварунихъ галай мискIин­дин имам Жейгьун Агьмедова ва масабуру иштиракна.

Гуьруьшдин эвел кьиляй Мегьамед Ибрагьимова центр официальный регистрация авунин вири месэлаяр акьалтIар­на­вайдакай ва алай вахтунда пешекарри ида­радин дараматдин проектдин винел кIва­лахза­вай­дакай хабар гана. Ада гьакIни къейд авурвал, алай йисан эхирдалди центради Махачкъалада диндин алим Ямин Мегьамедова гьазурнавай “Пак Къуръандин манайрин таржума лезги чIалал” ктабдин презентация кьиле тухуда. РикIел хкин, и ктаб алай йисуз Меди­нада 10 агъзур экземпляр тираж аваз чапдай акъатнава.

Гуьгъуьнлай мярекатдал рахай Шайдабег Мирзоева центр кардик акатун — лезги халкьдин уьмуьрда лишанлу вакъиа —  тебрикна. “Ихьтин центрайри лезги чIа­лаз, эдебиятдиз, медениятдиз, руьгьдин ирсиниз талукь месэлаяр гьялунин ва санлай милли меденият вилик тухунин карда кьетIен чка кьазвайдал са шакни алач”, — къейдна алимди.

Ислам Мегьамедова гьисабзавайвал, са акьван секин тушир алай аямда медениятдин, марифатдин, ахлакьдин жигьетдай кьиле тухузвай гьар са гьерекатдихъ, кьабулзавай гьар са серенжемдихъ еке метлеб ава. Ада центрадин векилриз жегьилрихъ галаз тухузвай кIвалахда эдебдинни ватанпересвилин тербиядиз кьетIен фикир гун меслятна ва республикадин Об­щественный палатадихъ галаз сих алакъа­яр хуьниз эвер гана.

Самир Абдулхаликьова, Халкьдин Соб­ранидин депутат яз, центрадиз вичелай алакьдай вири куьмекар гудайди хиве кьуна. Ада цIийи идара вири патарихъай виликди фин патал адан кIвалахдал алимар, писателар, экономистар, общественникар, яшайишдин маса хилерин пешекарар желб авун, гьар садан хиве тайин тир везифаяр тун теклифна.

Центрадин кIвалахдиз талукь яз чпин фикирар Ш.Асаханова, Э.Рустамова, М.Мегьамедова, А.Къагьриманова, М.Яралиева ва масабуруни лагьана. Эхирдай мя­ре­кат­дин иштиракчийри ихьтин гуьруьшар гьар вацра кьиле тухудай къарар кьабулна.

Агьмед Магьмудов