Донбассдин шегьерар ва хуьрер Украинадин миллетбазрикай, неонацистрикай азад авунин махсус серенжем давам жезва. Россиядин армиядин жергейра къуллугъзавай ва махсус серенжемда иштиракзавай чи аскерри игитвилер, дирибашвилер къалурзава. Россиядин оборонадин министерстводи абурун уьтквемвилиз, къастунал кIевивилиз, женгинин тежрибадиз виниз тир къимет гузва. ИкI, чи лезги хва майор Энвер Набиеваз Россиядин Игит лагьай тIвар гана. Чи игитри миллетбазрин гьужумар алудзава, ВСУ-дин яракьар, аскерар пучзава. Четинвилер ацалтзаватIани, мулкар фашистрин хашуниз къуллугъзавайбурукай азадзава. Чи кьегьалри шабагьар, тIварар патал женг чIугвазвач, абурун макьсад Ватан фашистрикай хуьн, командиррин тапшуругъар тамамарун я.
Дирибаш аскеррин кьегьалвилерикай Россиядин оборонадин министерстводин пресс-къуллугъди ара-ара хабар гузва. ИкI, прапорщик Замир Гьажимурадова ва адан юлдашри, хейлин вахтунда Украинадин неонацистрин гьужумар алудуналди, чпи кьунвай сенгерар ва чи аскерар саламатдиз хвена. Командирри Гьажимурадован дестедин вилик тапшуругъ эцигнавай: нубатдин сенгер кьун ва ам душмандив вахкун тавун. Россиядин кьушунрин сенгердай пад акъудунин мураддалди миллетбазар гьужумдиз фена. Гьажимурадован дестеди душмандин са шумуд гьужумдиз дуьзгуьн жаваб гана. Гранатометдай ада вичи цIудав агакьна бандеровчияр тергна. И арада чи са аскердал хер хьана. Замира, вичикайни фикир тавуна, хер хьанвай аскер саламат чкадиз тухвана, адаз медицинадин рекьяй сифте куьмек гана, ам къутармишна.
Йикъан вири вахтунда Гьажимурадован дестеди душмандин са шумуд гьужум алудна, фашистрикай хейлинбур ва абурун яракьарни тергна. Нетижада миллетбазри кьулухъди чIугуна. Идакай менфят къачуна, Замир Гьажимурадова чеб алай чка дегишарна ва вири аскерар телеф хьуникай хвена.
Тихий океандин флотдин гьуьлуьн пиядин кьилдин бригададин танкарин взводдин командир, старший лейтенант Руслан Къурбанова Донецкдин са хуьр Украинадин фашистрикай азадзавай женгина иштиракзавай. Вичин танкунаваз душмандин сенгеррин юкьваз гьахьзавай Къурбанован танк душманди ПТУР-дай яна, старший лейтенантдал хер хьана. Амма женгинай экъечIнач. Танкуниз зиян тахьанвайди акурла, ада женг давамарна ва хуьруьн кар алай чкаяр кьуна. Кьуд юкъуз давам хьайи женгера Къурбанова регьбервал гузвай танкарин взводди душмандин 14 танк, минометрин са батарея ва 200 миллетбаз тергна. Взводдикай садни хкатнач. Ихьтин кьегьалвилин нетижада душмандиз еке зиянар хьана, неонацистрикай хуьр азаддай мумкинвал гана.
РХБЗ-дин ротадин командир Жамалдин Рамазанован регьбервилик кваз женгинин ТОС-1 машиндин экипажди чи сенгеррай пад акъудиз кIанзавай Украинадин кьве сеферда гзаф авай неонацистрихъ галаз женг чIугвазвай чи подразделенийриз куьмек гун лазим тир. Машин яракьралди таъминар хъийидайла, душманди минометрай гуьлле гана. Нетижада экипаждин бязи аскеррал хирер хьана. Гьужумдиз къвезвай миллетбазрин къуватриз мукьва тирвиляй капитан Рамазанова гъиле-гъил аваз ва жуьрэтлувилелди вичин кар авуна. Женгинин тежрибадикай ва машин идара авунин алакьунрикай менфят къачуна, Рамазанова душмандин тупар алай чкайриз цIай гана. Механик-водителдин чка кьуна, женгинин машиндин экипаж, ахпа женгинин техникани душмандин тупарин гуьллейрикай саламат чкадиз тухвана. Капитан Рамазанован кар алакьунин ва жуьрэтлувилин гьерекатри миллетбазрин гьужумар акъвазарна, абуруз хейлин зарар гана, чи техника душмандин гъиле гьатдайвал авунач.
Медицинадин къуллугъдин майор Роберт Байрамбегова махсус серенжемда гьа сифтедилай иштиракзава. Гагь вертолетда, гагь машинда аваз ам вичин десте галаз гьинай къалабулухдин хабар атайтIани, гьаниз физва ва хер хьанвай аскерар, офицерар телеф хьуникай къутармишзава. Мисалар садни кьвед туш. Гзаф вахтара душмандин тупарин, зениткайрин гуьллейрин кIаник духтурри чпин кIвалах ийизва. Медицинадин сифте куьмек гузва ва ахпа хирер хьанвай кьегьалар госпиталриз агакьарзава. Майорди вичелай аслу вири крар тамамарзава, медицинадин къуллугъчияр себеб яз, чи аскерар куьмек агакь тийидайвал тазвач. Украинадин боевикри чи самолетар акъвазнавай аэропортуниз тупарай гуьлле гана. Роберт Байрамбегова анай хирер хьанвай 15 аскер ахкъудна. Гьа са вахтунда майордин дестедикай садни хкатнач. Маса сеферда ада вичин къуллугъчиярни галаз чи 600 аскер хаталу чкадай ахкъудна.
Донбассдин республикаяр азадзавай женгера викIегьвал къалурзавай чи игитрикай социальный сетра ихтилатзава. Абурун уьтквемвилел, жуьрэтлувилел чи агьалийри гьейранвалзава, дамахзава. Заз винидихъ чна кхьенвай кьегьал рухвайрин тIварарихъ инсанри лагьанвай гафар гъиз кIанзава: “Халис итим я. КичIе тахьана, юлдаш къутармишна. Ахьтин игитар Россиядиз кIанзава. Баркалла ваз!”
“Са куьнихъайни кичIе тушир умудлу, вафалу кьегьал я. Къуй ваз Аллагьди гьар са карда куьмек гурай! Аллагьди хуьрай вун, хва!”
“Россиядин гзаф миллетрикай ибарат халкьдал рикIин сидкьидай дамахиз кIанзава. Анжах садвал, дуствал къалуруналди чалай и вагьши дуьньяда чун хуьз жеда!”
“Алай вахтунда фронтда авайбуруз, гьар юкъуз миллетбазрихъ, фашистрихъ галаз женг чIугвазвайбуруз, чи хирер хьанвай аскерар къутармишзавай духтурриз сагърай лугьуз кIанзава. Гьар сад са игит я. Чун гьахълу рекье ава, гъалибни жеда!”
Эхь, чун гьахъ, дуьзвал, инсанвал, азадвал патал женгиниз экъечIнава. Гьавиляй, душманар тIимил туштIани, гъалибвал чи пата ава.
Хийир Эмиров
