Хизанриз (гьа гьисабдай яз гзаф аялар авайбурузни) яшайишдин рекьяй алава куьмек гунин мураддалди Дагъустан Республикада алай вахтунда агъадихъ галай нормативный правовой актар кьилиз акъудзава.
“Аялдиз гьар вацра пособие гунин гьакъиндай” Дагъустан Республикадин 2004-йисан 29-декабрдин 61-нумрадин закон, адал асаслу яз, гьар вацра аялдиз -112, текдиз амай дидейрин аялризни 224 манатдин кьадарда аваз пул гузва;
“Аялар авай хизанар патал яшайишдин алава серенжемрин гьакъиндай” Дагъустан Республикадин Президентдин 2007-йисан 31-майдин 71-нумрадин Указ, ана 5 лагьай ва адалай гуьгъуьнин аял хайила, — 10 агъзур, 10 лагьай ва адалай гуьгъуьнин аял хайила, — 300 агъзур, санал кьве аял хайила, — 20 агъзур, санал пуд ва адалай виниз аялар хайилани, 100 агъзур манатдин кьадарда аваз пул гун къалурнава;
“Дагъустан Республикада яшамиш жезвай, кесиб хизанрай тир 1-классдиз физвай аялриз са сеферда гудай пул тайинарунин гьакъиндай” Дагъустан Республикадин 2012-йисан 8-августдин 265-нумрадин къарар, ана Дагъустанда яшамиш жезвай дарда авай хизанрай тир аялар 1-классдиз фидайла, са сеферда яз 2000 манатдин кьадарда аваз пул гун къалурнава;
“Дагъустан Республикада гзаф аялар авай хизанриз яшайишдин рекьяй куьмек гунин серенжемрин гьакъиндай” Дагъустан Республикадин Гьукуматдин 2005-йисан 7-сентябрдин 146-нумрадин къарар, адал асаслу яз 18 йисал къведалди яшарин 3 ва адалай артух аялар авай, гьа гьисабдай яз хвавиле (рушвиле) кьабулнавай ва къаюмвалзавай хизанризни, коммунальный къуллугърай харжийрин 30 процентдин кьадарда аваз эвездин пулар (компенсация) вахчудай ихтияр ава:
— чимивал гудай къурулушдикай, цикай, канализациядикай, газдикай ва электроэнергиядикай менфят къачунай пулар, гьахъ-гьисаб кьадай тадаракрин (счётчикар) делилри къалурзавайвал, коммунальный къуллугърин ишлемишзавай кьадар фикирда кьуна тайинарнавай, амма Дагъустан Республикадин законодательствода ишлемишун патал тестикьарнавай нормативрилай артух тушиз. Гьахъ-гьисаб кьадай тадаракар авачир вахтунда винидихъ тIварар кьунвай коммунальный къуллугърай пул Россиядин Федерациядин законодательствода тестикьарнавай къайдада, абур ишлемишунин нормайрал асаслу яз, гуда;
— чимивал гудай къурулуш авачир кIвалера яшамиш жезвайбуруз кудай затIариз (нафт, кIарасар, къванцин цIивин) акъатзавай пул Дагъустан Республикада агьалийриз маса гун патал тайинарнавай нормаяр фикирда кьуналди гуда.
Винидихъ къалурнавай коммунальный къуллугърин харжийрин гьисабдай хгузвай эвездин пулар гзаф аялар авай, хизанда гьар са касдал яшамиш хьун патал тайинарнавай агъа кIанин кьадардилай тIимил пул ацалтзавай хизанриз Дагъустан Республикадин Гьукуматди коммунальный къуллугърай гун тайинарзавай къайдада, гьар вацра гудай пул яз, чара ийида.
Дагъустан Республикада яшайишдин кIвалин ва коммунальный къуллугърай агьалийрин кьилдин категорийриз гьар вацра гудай пулар чара авунин къайда Дагъустан Республикадин Гьукуматдин 2011-йисан 28-январдин 20-нумрадин къарардалди тайинарнава.
Гьазурайди — Рагнеда Рамалданова
