Сулейман-Стальский райондин кьил Нариман Абдулмуталибова 2017-йисан 12-январдиз акъудай тапшуругъдин бинедаллаз “Зи хуьр-зи чин” конкурс-килигун малумарнай. Экологиядин йисан сергьятра аваз тухвай конкурсдин метлеб, агьалийрин гегьенш къатар, карханаяр, идараяр, организацияр, хуьрерин администрацияр желб авуналди, аваданламишунин рекьяй лап хъсан хуьр тайинарун тир.
Конкурс 4 номинациядай тухвана: “Лап хъсан хуьр”, “Виридалайни хъсандиз аваданламишнавай кIвал”, “Лап хъсан школадин гьаят” ва “Школадилай виликан идарадин лап хъсан гьаят”.
Конкурс-килигунин нетижаяр махсус комиссияди кьуна. Нетижада “Лап хъсан хуьр” номинациядай 1-чка Кьасумхуьруьн администрацияди кьуна.
“Виридалайни хъсандиз аваданламишнавай кIвал” номинациядай 1-чка АгъастIал-Къазмайрилай тир Рудик Рамазанован, 2-чка Кьасумхуьрелай тир Тамара Рамазановадин гьаятриз гана.
“Лап хъсан школадин гьаят” номинациядай 1-чка Кьулан СтIалрин юкьван школади, 2-чка ЦIийи поселокдин юкьван школади ва 3-чкани Курхуьруьн М.Рагьимован тIварунихъ галай 1-нумрадин юкьван школади кьуна.
“Школадилай виликан идарадин лап хъсан гьаят” номинациядай 1-чкадиз АгъастIал — Къазмайрин “Чубарук” аялрин бахча, 2-чкадиз Кьасумхуьруьн 1-нумрадин аялрин бахча лайихлу хьана.
И йикъара райондин кьил Нариман Абдулмуталибова райадминистрацияда кьиле тухвай совещанидал “Зи хуьр-зи чин” конкурс-килигуна гъалиб хьайи ва приздин чкаяр кьур хуьруьн администрациядин кьил Далгат Бабаевав, идарайринни организацийрин руководителрив ва кьилдин ксарив дипломар вахкана, абуруз тебрикдин келимаяр лагьана.
Конкурс-килигунин положенидихъ галаз кьадайвал, гьар са номинациядай гъалибчийриз ва призерриз 10000, 6000 ва 4000 манатдин кьадарда аваз пулдин призар гана.
Нариман Шамсудиновича къейд авурвал, конкурс-килигуни хъсан нетижа гана. Гьавиляй ам районда гуьгъуьнин йисарани тухуда, иштиракзавай хуьрерин адми-нистрацийрин, организацийрин, карханайрин, идарайрин, гьакIни кьилдин ксарин — кIвалерин иесийрин кьадар артухарда.
Хазран Кьасумов
