Шукур хьайи Сад Аллагьди инсанар дуьньяда михьивал, экуьвал хвена, а патал алай касдиз писвал тавуна, фитнедивай — гъибетдивай яргъа хьана, Аллагьди Вичи къалурнавай пак рекьяй экъечI тавуна, куьмек герек инсанриз ва гьакIни чан алай кьван затIариз жувавай жедай дава-чара авун, яни, инсанар инсанвилин рекье аваз яшамиш хьун патал халкьнава.
Халикьди, чпиз Вичин патай кьетIен пай ганвай жерягьарни, инсанарни ава. Инал вичикай ихтилат физвай кас гьахьтин муъмин инсанрикай я — баркаллу, камаллу, уьтквем чи лезги хва, психотерапевт-психолог, жерягь, биоэнерготерапевт, Аллагьдин имандин рекье авай Пашаев Вагиф-гьажи Алипашаевич. И зурба руьгьдин къуватар авай касдикай макъалаярни, ктабарни акъатнава. Ам гзаф кьадар дипломрин, сертификатрин, чIехи премийрин, лайихлу тIварарин сагьибни я. Адаз ганвай шабагьрихъ кьадар авач. Ингье абурукай са шумуд: “Дуьньядин виридалайни хъсан целитель” конкурсдин лауреат, Россиядин “Целительский Олимп — Золотые Руки” пешекарвал тестикьардай премиядин “Россиядин целителрикай виридалайни хъсанди” номинациядин лауреат. Адаз Къизилдин дипломни гьуьрметдин лента галаз “Дуьньядин целитель” лагьай тIвар ганва. Мадни ам Москвада общественный палатадин член, эксперт, “Сад тир Россия” партиядин членни я. Вагиф-гьажидиз “Миллетдин сагъвал мягькемаруник пай кутунай” къизилдин медаль ганва. Вагиф-гьажи Европадин психотерапевтрин Ассоциациядин, Комплементарный медицинадин Международный Регистрдин, Виридуьньядин жерягьрин, целителрин, эниоинженеррин кIватIалдин членни я.
Ихьтин зурба дережайрихъ агакьнавай чи кьегьал хцикай, ада вичин патав атай, Аллагьдин пак рекьевай инсанриз михьи рикIелди къуллугъзавай крарикай пара кхьиз жеда. Адахъ адан гъиликай себеб хьайи ксар кIевелай инанмишни я. Дугъриданни, завайни и кар субутиз жеда. Са кьадар йисар идалай вилик, Махачкъалада ам авай чка жагъурна, зунни адан патав фена. Вири тIалрикай за лугьудач. Садлагьана зи гъил, къуьнуьхъай галатдайди хьиз тIа хьанвай. Зи гъилиз вуч хьанвайтIа, я духтуррин, я зи кьилни акъатзавачир. Вагиф-гьажиди зун хушдаказ кьабулна, вичин гъил захъ галукьарни тавуна, зи кьилелай гъил алтадна, дуьаяр кIелна, захъ вуч хьанватIани лагьана. Акваз-акваз, адан патав гумаз, зи гъилин тIал секин жез гатIунна. Са тIимил йикъарилай тIал квахьна. Дугъриданни, заз жув цIийиз дуьньядал ахкьалтай хьиз хьана.
Вагиф-гьажидиз инсандин рикIяй физвай хиялрикайни аян жезва, инсандиз вуч уьзуьр аватIани аквазва. РикI михьи, Аллагьдихъ агъунвай инсанриз адан гъиликай себеб жезва. Адан гъиликай вичиз себеб хьайи Муртузалиева Гуьлейбата ингье вуч лугьузватIа.
— Зун, гъилер, кIвачер, дуркIунар, рикI тIаз, шекердин диабет, мастопатия азарарни аваз, духтуррикай са чарани тахьайла, Вагиф-гьажидин патав фена. Ада заз захъ авай вири уьзуьрар гьисабна, вири авайвал лагьана. Сеанс тухвана, дуьаяр кIелна. Гьа икI, зун са кьадар вахтунда адан патав физ, хтана. Зи беден яваш-яваш сагъ жез гатIунна. Зун михьиз сагъ, дири хъхьана. УЗИ-диз вегьейла, са уьзуьрни мад жагъанач. Зун гилани, са тIимил кьван гьал чIур хьанмазди, адан патав физва.
Адан тIварцIихъ ихьтин дуьаяр ийизвай инсанар зал гзаф гьалтзава. Дугъриданни, Вагиф-гьажидиз Вагъуф бубадин руьгьдин къуват ганва. Ам Сад Аллагьди вичиз ихьтин илгьамдикай, паквиликай пай ганвай инсан я.
Заз инал мадни ихьтин крарикайни лугьуз кIанзава. Россиядин адетдин ва халкьдин медицинадин пешекаррин Ассоциациядин (РАМН) президент, РАЭН-дин, РАМНТ-дин член-корреспондент, РФ-дин Госдумадин комитетдин председателдин заместитель Владимир Егорова Вагиф-гьажидиз Москвада авай Россиядин халкьарин дуствилин Университетдиз пешекарвал мадни хкажун патал эвернава.
Москвада лезгийри медицинадин центр ачухнава. А клиникадин чIехиди чи кьегьал лезги хва Гьажиев Герейхан я. Анин кьилин духтур лагьайтIа, вичин чирвилерин рекьяй дуьньяда 3-чка кьунвай, вичиз Аллагьдин кьадардалди Вагиф-гьажидин гъиликай себеб хьанвай чи игит хва, хъсан неврапотолог, педиатр, остепат Давудов Низам Давудович я. Гьа и клиникадини Вагиф-гьажидиз кIвалах теклифнава.
Гьар са кас дуьзвилин, паквилин рекье хьайитIа, хъсан я! Чна и дуьньядай тухузвай затIни авайди туш. Амукьзавайди хъсанвал я.
C.Умаханова
